გიორგი კაპანაძე: პირველ რიგში, ბოდიშს ვუხდი „უცნობი კავკასიის“ წამყვანს, ნათია გამცემლიძეს...

„უცნობი კავკასიის“ ეთერში მედია ჰოლდინგ „დრონი.ჯი“-ს დამფუძნებლისა და ჟურნალისტ ალეკო ელისაშვილის დებატებმა საზოგადოების დიდი გამოხმაურება გამოიწვია... გთავაზობთ გიორგი კაპანაძესთან ინტერვიუს!

- გიორგი, ელისაშვილმა „დრონი.ჯი“-ს მისამართით საკმაოდ მძიმე ბრალდება წამოაყენა...

- ალექსანდრეს კარგად არ ვიცნობ, თუმცა, მრჩებოდა შთაბეჭდილება, რომ საკმაოდ ნორმალური ჟურნალისტი იყო.... ცუდია, როდესაც ცდილობენ ჟურნალისტები ერთმანეთს გადაჰკიდონ, პრესა და ზოგადად, მედია გახლიჩონ და მხარეებად დაჰყონ. გარწმუნებთ, თუ ეს ვინმეს, მათ შორის კრემლის დღევანდელი ფავორიტი პოლიტიკოსის ინტერესებში შედის, ყოველივე ამას შესაძლოა საკმაოდ მძიმე შედეგები მოჰყვეს.

შესაძლოა მედიის გახლეჩვით კრემლის მარიონეტებმა ისარგებლონ, მაგრამ ქვეყნისთვის, რომელიც ფაქტობრივად, საომარ მდგომარეობაში იმყოფება, ქვეყნისთვის, სადაც თითქმის ყოველდღეა მოსალოდნელი სიტუაციის დაძაბმა, რუსეთის ქართველი კომპასების გარდა არავის აწყობს მედია-ომი.

ამიტომ, არ ვაპირებ, ალექსანდრეს ბრალდებას ბრალდებითვე ვუპასუხო. ფაქტია, რომ მედია ჰოლდინგმა „დრონი.ჯი“-მ, რომელიც აერთიანებს ინტერნეტ-ტელევიზიას, ყოველკვირეულ გაზეთს, სარეკლამო სააგენტოს, პიარ ტექნოლოგიების ცენტრს და გამომცემლობას, მედია-ბაზარზე საკმაოდ სოლიდური, წარმომადგენლობითი ადგილი დაიკავა. ჩვენ გვაქვს რამდენიმე ახალი პროექტიც, რომლის განხორციელებასაც უახლოეს მომავალში ვგეგმავთ. ასე რომ, ვინც არ უნდა შეეცადოს, როგორმე დაჩრდილოს ჩვენი კომპანია, გარწმუნებთ რომ არ გამოუვათ.

დააკვირდით: კრემლი, ქართული ოპოზიციის ზოგიერთ წარმომადგენელთან გაურკვეველი ხელშეკრულების გაფორმებით, ოპოზიციის პრორუსული ნაწილის წამოწევით, ფაქტობრივად, ორხელისუფლებიანობის ელემენტების დამკვიდრებას აპირებს. როგორც ჩანს, ვინმეს სურს, რომ თავისი წვლილი შეიტანოს ქართული მედიის „გაკეთილშობილების“ საქმეშიც. ანუ მედია და ჟურნალისტები დაჰყონ პრორუსულებად და პროსახელისუფლებო ჟურნალისტებად.

სამწუხაროა, რომ ალექსანდრემ „უცნობ კავკასიაში“ მოახერხა თავისი ფანტაზიის რეალიზაცია. მან თავად განაცხადა, რომ ზღაპრების წერა შეუძლია. ახლა, ძმებ გრიმებამდე ან ანდერსენამდე შეიძლება ვერ „ქაჩავს“, მაგრამ დასაწყისისათვის არაუშავს...

მიუხედავად ამისა, პირველ რიგში, ბოდიშს ვუხდი „უცნობი კავკასიის“ წამყვანს, ნათია გამცემლიძეს იმის გამო, რომ გადაცემის დასრულების შემდეგ, მთლად კორექტულად არ მოვიქეცი. ბოდიშს ვუხდი ყველას, რადგან ნამდვილად არ მსურდა ვინმესთან, მათ შორის ალექსანდრესთან დაპირისპირება. ეს არანაირად არ შედის ჩემს ინტერესებში, თუმცა, თავი ვერ შევიკავე და ალბათ, საკმაოდ აგრესიულად გამოვიყურებოდი ტელე-ეთერშიც და გადაცემის დასრულების შემდეგაც...


კომენტარი