თანამედროვე მუსიკის დღეები სტარტს დღეს, ბათუმის ჩოგბურთის კორტებზე კახაბერი და ხანუმების კონცერტით აიღებს

”ჰით ბათუმის 2015” გრძელდება. ამჯერად, 6-9 აგვიტოს ბათუმში, პროექტის ფარგლებში თანამედროვე მუსიკის დღეები გაიმართება. ზღვისპირა ქალაქი უცხოელ და ქართველ თანამედროვე შემსრულებლებს უმასპინძლებს.

თანამედროვე მუსიკის დღეები სტარტს 6 აგვისტოს, ბათუმის ჩოგბურთის კორტებზე კახაბერი და ხანუმების კონცერტით აიღებს.

ბათუმელი მუსიკოსი აგვისტოს ცხელ სეზონზე „ჰით ბათუმის“ მთავარი სტუმარი იქნება. „ანიდან ჰაემდე“ ასე ქვია ბოლო ალბომს, რომელითაც კახაბერმა ხანუმებთან ერთად ევროპა უკვე მოიარა. აუდიტორიას კი, თავის ბოლო ნამუშევრებს სწორედ, მშობლიურ ქალაქში წარუდგენს.

„ძალიან სასიამოვნოა, როცა ფესტივალის ფარგლებში თანამედროვე მუსიკიის დღეებს ჩვენ ვხსნით. სიმღერები შესრულდება როგორც პირველი, ასევე ინტერნაციონალური ალბომიდან. დღეს ერთ-ერთი საუკეთესო გამოსვლა იქნება ჩვენი მხრიდან კორტების სცენაზე,“ - აღნიშნა მუსიკოსმა.

კახაბერი (კახა ცისკარიძე) ერთ ერთი ყველაზე მნიშვნელოვანი და ნიჭიერი მუსიკოსია (დრამერი) საქართველოში. მისი ნამუშევრების დიდი ნაწილი დღეს უკვე პოპულარულია და ჰიტად არის ქცეული. ის ავტორია წარმატებული მუსიკალური პროექტების საქართველოში, რომელიც საერთაშორისო დონეზეა აღიარებული. „კახაბერი და ხანუმები“ მისი ბოლო მუსიკალური პროექტია, რომელიც წარმატებულია არამხოლოდ საქართველოში, არამედ მის ფარგლებს გარეთ. მისი პირველი ალბომი "ანიდან ჰაემდე“ მიზნად ისახავს ქართული ფოლკლორის პოპულარიზაციას თანამედროვე შტრიხებით.

თანამედროვე მუსიკის კვირეულში ასევე მონაწილეოებენ რომა რცხილაძე და მისი ბენდი „+995“, MANOLO “The Voice of the Gypsiess”, უკრაინული პოპ-როკ ჯგუფი „ოკეან ელზი“ და ინგლისური ალტერნატიული როკ ბენდი „ტოპლოადერი“.

კონცერტები ბათუმის ჩოგბურთის კორტებზე, 20:00 და 21:00 საათზე გაიმართება. საფესტივალო კლუბი კი 7-8 აგვისტოს, 23:00 საათზე VIVA Brasil-ს უმასპინძლებს. თანამედროვე მუსიკის დღეები 9 აგვისტოს, რომა რცხილაძისა და მისი ბენდის „+995“ და „ტოპლოადერის“ კონცერტებით დასრულდება.

პროექტი „ჰით ბათუმი“ 11 კვირისგან შედგება და თოთოეული კვირა სხვადასხვა მიმართულების არტს მოიცავს. მრავლფეროვანი პროგრამა გათვლილია ყველა თაობისა და გემოვნების ადამიანისთვის. შესაბამისად, დამსვენებლებს შესაძლებლობა აქვთ, საკუთარი ინტერესებიდან გამომდინარე, დაგეგმონ ბათუმში დასვენებისა და გართობის დღეები.

„ჰით ბათუმის“ ფარგლებში, 2 თვის განმავლობაში დაგეგმილია 200-ზე მეტი ღონისძიება, ამ პერიოდის განმავლობაში ბათუმს 20-მდექვეყნიდან 259 უცხოელი არტისტი სტუმრობს. ღონისძებაში ჩართულია 50 ორგანიზაცია და 2000-მდე მონაწილე.

„ჰით ბათუმი 2015“ წარმოადგენს ბათუმის საზაფხულო სეზონის სპეციალურ პროექტს, რომელიც თავის თავში მოიცავს 2 თვიანი პერიოდის განმავლობაში სხვადასხვა მიმართულების ფესტივალებისა და გასართობი ღონისძიებების ჩატარებას უწყვეტ რეჟიმში. 6 ივლისიდან 15 სექტემბრამდე, ყოველ კვირას, ბათუმში ჩატარდება განსხვავებული ტიპის ივენთები, რომლის კომუნიკაციაც მოხდება ერთიანი ქოლგის ქვეშ, სახელწოდებით „ჰით ბათუმი“.

პროექტის განმახორციელებელია ბათუმის მერია და საკრებულო, ასევე მის განხორციელებაში ჩართულები არიან კულტურისა და ძეგლთა დაცვის სამინისტრო და მისი სსიპი „კულტურის განვითარების საინვესტიციო ფონდი“, ტურიზმის ეროვნული ადმინისტრაცია და აჭარის ტურიზმის დეპარტამენტი. პროექტი „ჰით ბათუმი“ სახელმწიფო პროექტს წარმოადგენს, რომლის მიზანია ერთის მხრივ აჭარის ტურისტული პოტენციალის, ხოლო მეორეს მხრივ მთლიანად ქვეყნის პრომოუშენი გარე და შიდა აუდიტორიაში.