"უკრაინული იარაღის ექსპორტი იქნება რეალური"

"ჩავატარე გაფართოებული თათბირი უკრაინული იარაღის ექსპორტის საკვანძო საკითხებთან დაკავშირებით. უკრაინული იარაღის ექსპორტი იქნება რეალური. ჩვენ შევათანხმეთ ყველა დეტალი ჩვენი სახელმწიფო ინსტიტუტების დონეზე. ამჟამად, ჩვენი უსაფრთხოების ექსპერტიზა და იარაღი, რომელიც გამოცდილია თანამედროვე ომში, საინტერესოა ყველა იმ პარტნიორისთვის, ვისაც სურს უზრუნველყოს საკუთარი სახელმწიფოებრიობისა და მოქალაქეების სიცოცხლის დაცვის რეალური დონე.

პარტნიორებს, რომლებიც უკრაინას ეხმარებიან, ჩვენ შევთავაზეთ თანამშრომლობის განსაკუთრებული ფორმატი - Drone Deals. ეს არის სპეციალური შეთანხმებები ჩვენი დრონების, რაკეტების, ჭურვებისა და სხვა მოთხოვნადი იარაღის, საბრძოლო ტექნიკის, პროგრამული უზრუნველყოფის წარმოებასა და მიწოდებაზე, პარტნიორების თავდაცვის სისტემებთან ინტეგრაციაზე, ასევე ჩვენი ექსპერტიზისა და უკრაინისთვის საჭირო ტექნოლოგიური გაცვლის უზრუნველყოფაზე. დღეს დავამტკიცე ასეთი სახელმწიფოთაშორისი მუშაობის მიმართულებები და ბიზნესისთვის იარაღის ექსპორტზე ავტომატური ნებართვების გაცემის წესი.

მოქმედების წესი აბსოლუტურად ნათელია:

სახელმწიფოთაშორის დონეზე, ურთიერთგაგების პრინციპით, შესაბამისი შეთანხმებით განვსაზღვრავთ უსაფრთხოების სფეროში მუშაობის ჩარჩოებს.

ამის შემდეგ იწყება პროცესი სახელმწიფო ინსტიტუტებისა და მწარმოებლების დონეზე.

ჩვენ ვამარტივებთ ბიუროკრატიულ პროცედურებს, ვინარჩუნებთ საექსპორტო კონტროლის საკმარის დონეს და ვიწყებთ კომპანიების პრაქტიკულ მუშაობას.

უკრაინული კომპანიები მიიღებენ რეალურ შესაძლებლობას, გავიდნენ პარტნიორი ქვეყნების ბაზარზე იმ პირობით, რომ ჩვენს სამხედროებს ექნებათ უფლება, საჭირო რაოდენობის იარაღი პირველებმა მიიღონ. უკრაინაში წარმოების შესაძლებლობების პროფიციტი (ჭარბი წარმოება) ზოგიერთი ტიპის იარაღზე 50%-ს აღწევს. ეს არის უკრაინის თავდაცვის ინდუსტრიაში განხორციელებული სახელმწიფო ინვესტიციებისა და პარტნიორებთან თანამშრომლობის პირდაპირი შედეგი.

დავავალე უკრაინის საგარეო საქმეთა სამინისტროს, დაზვერვასთან და უსაფრთხოების სამსახურთან (SBU) ერთად, განსაზღვრონ იმ ქვეყნების სია, სადაც ჩვენი იარაღის ექსპორტი შეუძლებელია აგრესორ ქვეყანასთან მათი თანამშრომლობის გამო. ეს სერიოზული გამოწვევაა - არ დავუშვათ ჩვენი ტექნოლოგიებისა და იარაღის ნიმუშების რუსების ხელში ჩავარდნა.

უკრაინის ეროვნული უსაფრთხოებისა და თავდაცვის საბჭო (RNBO) გაუწევს კოორდინაციას საექსპორტო პროცესებს და იქნება გარანტი იმისა, რომ პირველ რიგში დაკმაყოფილდება უკრაინის თავდაცვის ძალების საჭიროებები, ხოლო ექსპორტზე გაიგზავნება მხოლოდ ნამატი - ის, რისი წარმოებაც კომპანიებს სახელმწიფო შეკვეთაზე ზემოთ შეუძლიათ. უკრაინის თავდაცვის სამინისტრო და გენერალური შტაბი განსაზღვრავენ ჩვენი თავდაცვის ძალების საჭიროების მოცულობას.

დავავალე მთავრობის წევრებსა და უშიშროების საბჭოს, საზოგადოებას წარუდგინონ საჭირო ინფორმაცია იარაღის ექსპორტის პროცესის დეტალების შესახებ.“ - უკრაინის პრეზიდენტი, ვოლოდიმირ ზელენსკი სოციალურ ქსელში.