მიუნხენში ოქრუაშვილთან სამი პოლიტიკოსის მიერ გამართული შეხვედრის შემდეგ, საქართველოს ყოფილი პრემიერ-მინისტრი და ამჟამად ოპოზიციის ერთ-ერთი ლიდერი ზურაბ ნოღაიდელი ახალი პოლიტიკური გაერთიანების შექმნაზე ალაპარაკდა. ქართველი ოპოზიციონერების და სააკაშვილის მთავრობის ყოფილი წარმომადგენლების – ზურაბ ნოღაიდელის, ირაკლი ოქრუაშვილის (გაჩეჩილაძის გამოკლებით) ახალი ინიციატივა პოლიტიკური გაერთიანების შექმნასთან დაკავშირებით უკვე გააკრიტიკა „ალიანსის“ ყოფილმა ლიდერმა, დავით გამყრელიძემ. როგორც მოსალოდნელი იყო, კრიტიკაზე მწვავე რეაქცია ჰქონდა ნოღაიდელს და წარსული ცოდვების გახსენებაც დაიწყო... ნოღაიდელმა გამყრელიძეს 94-95 და მოგვიანებით უკვე 2006 წელს ხელისუფლებასთან ახლობლობით ფულის კეთება წამოაძახა და სააკაშვილის რეჟიმის დასასრულის დაწყების ხელშეშლაში დაადანაშაულა. „ალიანსს“ რომ ოპოზიციური გაერთიანება არ ჩაეშალა, 30 მაისს სააკაშვილის რეჟიმის დასასრული დაიწყებოდა“, – აცხადებს „ეროვნული საბჭოს“ თავმჯდომარე, თუმცა ნოღაიდელი, ალბათ, ოპოზიციის ამ შეცდომის აღმოფხვრას მისი, ოქრუაშვილის და ლევან გაჩეჩილაძის მიერ შექმნილი ახალი გაერთიანებით შეეცდება.