„მე მისთვის პირველი ვიქნები, ეს სულ სხვა შეგრძნებაა, ჩემამდე ის არავისი ყოფილა“, - ესაა ის „ინტრიგა“, რომლის მოსმენისას ვერაფრით წარმოიდგენ, რომ მთავარი გმირი ამ ფრაზას ახალ ავტომობილზე ამბობს და არა, მაგალითად, ახალ შეყვარებულზე...

ამ რეკლამის ეთერში გაშვების შემდეგ, თბილისში კიდევ ერთხელ ალაპარაკდნენ საქართველოს ბანკის სარეკლამო კამპანიაზე. თუმცა, „დრონი.ჯი“-ს მიერ მოპოვებული ინფორმაციით აღმოჩნდა, რომ ეს უფრო წარმატებული პლაგიატობაა, ვიდრე სარეკლამო კამპანია...

საქმე ისაა, რომ პოპულარულ საიტ „იუთუბზე“ განთავსებულია კომპანია „ფოლცვაგენის“ სარეკლამო რგოლი, რომელიც, ჰოი საოცრებავ, საქართველოს ბანკის „კრეატიულ“ სარეკლამო მიგნებებს მოგაგონებთ (http://www.youtube.com/watch?v=Y9nUHEHbR78). არც მეტი, არც ნაკლები, „საქართველოს ბანკის“ „კრეატიული აღმოჩენა“, „იუთუბზე“ განთავსებული „ფოლცვაგენის“ რეკლამის ქართულად გადმომღერებაა (უმნიშვნელო დამატებებით).

ბანკის მიზანი, მომხმარებელს მიეცეს შესაძლებლობა ძველი ავტომობილი ახალში გადაცვალოს, ხოლო ფასთა სხვაობა სესხის სახით დაფაროს, მისასალმებელია.

თუმცა, ბედის ირონიაა ისიც, რომ „საქართველოს ბანკი“ ამ სიახლეს მოპარული იდეით აცნობს მაყურებელს და ამავე დროს, მხოლოდ „ტოიოტასთან“, „კიასთან“ და „ჰიუნდაისთან “ აქვს გაფორმებული კონტრაქტი (ძველი ავტომობილის ახალში გადაცვლის შესახებ) და არა, „ფოლცვაგენთან“, რომელსაც ერთ-ერთმა ყველაზე პოპულარულმა ბანკმა (ან ბანკის მიერ დაქირავებულმა სარეკლამო კომპანიამ) იდეა აწაპნა.