„ჩვენგან არის მზაობა შევხვდეთ ქალაქის მერს და ერთობლივად მოვიძიოთ გამოსავალი“ - გოგა ზაქაიძე
სასტუმრო „ბუდაპეშტის“ დამფუძნებელი, გოგა ზაქაიძე თბილისის მერს მიმართავს და იმედოვნებს რომ „არსებული ჩიხური სიტუაციიდან“ გამოსავალს ერთად მოძებნიან.
საქმე ეხება ვაკის პარკთან სასტუმროს მშენებლობას, რომელზეც კანონიერი ნებართვა იყო გაცემული, რაც ცოტა ხნის წინ სასამართლოს გადაწყვეტილებითაც დადასტურდა.
მიუხედავად ამისა, თბილისის მერმა, როგორც ჩანს, კანონს პოპულისტობა არჩია და განაცხადა: „ყველაფერს გავაკეთებ, რათა ვაკის პარკში სასტუმრო არ აშენდეს“.
სწორედ ეს გახდა სასტუმრო „ბუდაპეშტის“ დამფუძნებლის მიმართვის საფუძველი, რომელმაც არსებული ქონება კანონის სრული დაცვით შეიძინა.
"ბოლო დროს განვითარებულმა მვლენებმა მიიღო ფსიქოლოგიური ზეწოლის და ძალადობის ფორმა. ამ პროცესში მე და ჩემი კომპანია უსამართლოდ აღმოვჩნდით სისტემის და სზოგადოების პირისპირ.
მთელი ამ დავის პროცესში ყველა დაინტერესებულმა თუ მონაწილე მხარემ, დაგვადანაშაულა ჩვენ, მათ შორის, ქალაქის ძველმა და ახალმა ხელმძღვანელობამ.
სასტუმრო ბუდაპეშტის მშენებლობაზე პასუხისმგებლობა მთლიანად დაგვეკისრა მხოლოდ ჩვენ.
მინდა მივმართო ყველა დაინტერესებულ პირს, ჩვენმა კომპანიამ ეს ტერიტორია, შეისყიდა კანონის სრული დაცვით, არც არავის უჩუქებია და არც სიმბოლურ ფასად 1 ლარად შეგვიძენია.
იყო გამოტანილი გასაყიდი საინვესტიციო ქონება და ჩვენმა კომპანიამ ის შეიძინა. ჩვენ შევიძინეთ, კომპაქტური და არქიტექტურულად გარემოსთან შესატყვისობაში მყოფი პროექტი, რაზეც იყო გაცემული ნებართვა.
თუ საზოგადოება გადახედავს ვაკის პარკის მიმდებარედ ან მის ტერიტორიაზე არსებულ შენობა-ნაგებობებს, ჩვენი პროექტი მათთან შედარებით, შეიძლება ითქვას, რომ არის უნიკალური ეკოლოგიური ნაგებობა.
რაც შეეხება საკითხს, თუ რატომ შევყევით სასამართლო დავაში არასამთავრობოებს და აქტივისტთა ჯგუფებს, ჩვენ მივიჩნიეთ, რომ როგორც ძირითადად ხდება, პროცესი იყო მართული.
ამ ადგილზე არსებობდა რესტორანი, ხოლო ვაკის პარკისგან მიტაცებულ ტერიტორიებზე იგივე პერიოდში აშენდა კორპუსები, რესტორნები, სხვა ინფრასტრუქტურა, საზოგადოების არც ერთ ნაწილს, არც ერთ ეტაპზე, ეს პროცესი არ გაუპროტესტებია.
ჩვენგან არის მზაობა შევხვდეთ ქალაქის მერს, კახი კალაძეს და ერთობლივად მოვიძიოთ ამ ჩიხური სიტუაციიდან გამოსავალი.
გვაქვს მოლოდინი რომ მერია გადმოდგამს შემხვედრ ნაბიჯს და მოგებული პროცესის მიუხედავად მოლაპარაკების მაგიდასთან დავსხდებით“, - წერს სოციალურ ქსელში გოგა ზაქაიძე.
მსგავსი სიახლეები
კომენტარი