ნანუაშვილის ინიციატივა - პარლამენტარების მიერ შეურაცხმყოფელი გამონათქვამების რეგულირება
საქართველოს სახალხო დამცველმა საქართველოს პარლამენტს პარლამენტარების მიერ შეურაცხმყოფელი გამონათქვამების რეგულირების შესახებ ზოგადი წინადადებით მიმართა. როგორც სახალხო დამცველის აპარატის მიერ გავრცელებულ განცხადებაშია აღნიშნული, უჩა ნანუაშვილის ინიციატივა ეხება პარლამენტის წევრების მიერ სიძულვილის ენის ან დაუცველი ჯგუფების მიმართ სხვა სახის შეურაცხმყოფელი გამონათქვამების გამოყენებას.
„სახალხო დამცველი ზოგად წინადადებაში მიუთითებდა, რომ 2016 წლის 3 თებერვალს პარლამენტის სხდომაზე პარლამენტის წევრმა გოგი თოფაძემ შეურაცხმყოფელ კონტექსტში მოიხსენია დაუნის სინდრომის მქონე ადამიანები, პარლამენტარმა თამაზ მეჭიაურმა კი ამ სინდრომის მქონე ადამიანებს „ავადმყოფები“ უწოდა. წინადადებაში ასევე ასახულია პარლამენტის სხვადასხვა წევრის შეურაცხმყოფელი გამონათქვამები სხვადასხვა დაუცველი ჯგუფის მიმართ.
სახალხო დამცველი აღნიშნავს, რომ ზოგად წინადადებაში მითითებული გამონათქვამები, უმეტეს შემთხვევაში, საქართველოს VIII მოწვევის პარლამენტის წევრებს ეკუთვნის, თუმცა, საკითხის სენსიტიურობიდან გამომდინარე და მოქმედი პარლამენტარების მხრიდან მსგავსი გამონათქვამების მომავალში თავიდან აცილების მიზნით, სახალხო დამცველმა საქართველოს პარლამენტს მიმართა ზოგადი წინადადებით:
განიხილოს საქართველოს კონსტიტუციის 52-ე მუხლის მე-4 პუნქტით გათვალისწინებული პარლამენტის წევრის „მოვალეობის შესრულების“ ცნების საკანონმდებლო დონეზე განსაზღვრის შესაძლებლობა;
პარლამენტის წევრის „მოვალეობის შესრულების“ ცნების განსაზღვრის შემთხვევაში, განიხილოს „მოვალეობის შესრულების“ ფარგლებს გარეთ გაკეთებული შეურაცხმყოფელი, „სიძულვილის ენის“ შემცველი განცხადებების, ან დანაშაულებრივი მოწოდებების გამო პარლამენტის წევრის სამართლებრივი პასუხისმგებლობის დაკისრების მექანიზმის შექმნის შესაძლებლობა;
სამართლებრივი პასუხისმგებლობის დაკისრების მექანიზმისა და მისი განხორციელების ფორმების შექმნა მოხდეს ვენეციის კომისიის შესაბამის ანგარიშში განხილული მოდელების (სასამართლოს ან პარლამენტის მიერ იმის განსაზღვრა, ექცევა თუ არა პარლამენტარის გამონათქვამი მისი ინდემნიტეტის ფარგლებში) გათვალისწინებით" - აღნიშნულია სახალხო დამცველის აპარატის განცხადებაში.
მსგავსი სიახლეები
კომენტარი