კახა კუკავა ზურაბ ნოღაიდელს კბენს
,,იცით, კახა შარტავას არასდროს არაფერი მოსწონდა და ახლაც ასეა, ვგულისხმობ ოპოზიციის ქმედებებს. ნუ, ეს მისი უფლებაა. შარტავა ყოველთვის გვაკრიტიკებს. თუმცა ჩვენ "ფორუმის" ინიციატივას საარჩევნო გარემოს შეცვლასთან დაკავშირებით მივესალმებით, მაგრამ არანაირ ულტიმატუმს, რასაც არ უნდა უკავშირდებოდეს ის, არ მივიღებთ. თუ ეს ულტიმატუმი ძალაში დარჩება, რა თქმა უნდა, "ეროვნული საბჭო" "ფორუმთან" არ ითანამშრომლებს", – განუცხადა "დრონი.ჯი"-ს "ეროვნული საბჭოს" ერთ-ერთმა ლიდერმა, კახა კუკავამ.
– "ეროვნულმა საბჭომ" ადგილობრივ არჩევნებში ხმების 8%-ი მიიღო, რამ განაპირობა ასეთი შედეგი, რა დაგანახათ არჩევნებმა და საერთოდაც, რა იყო ოპოზიციის მარცხის მიზეზი?
– იცით, ჩვენთვის ადგილობრივი არჩევნების ასეთი შედეგით დამთავრება მოსალოდნელი იყო და სრულებითაც არ გაგვკვირვებია. რაც შეეხება იმას, თუ რამ გამოიწვია ოპოზიციის დამარცხება, გეტყვით, რომ მარცხის მიზეზი იყო, ერთი მხრივ, საარჩევნო გარემო, რომელშიც ჩვენ არჩევნები ჩავატარეთ, ანუ არჩევნები თავისუფალი არ იყო, მეორე მხრივ კი ის, რომ არჩევნებზე ჩვენ ერთიანი კანდიდატის წამოყენება და შემდეგ უკვე ორგანიზებულად და საკმარისად საარჩევნო კამპანიის წარმართვა ვერ შევძელით. არჩევნებმა დაგვანახა, რომ ქვეყანაში სხვა პოლიტიკური ველია შექმნილი და აუცილებელია ხელისუფლების წინააღმდეგ უფრო ძლიერი პოლიტიკური მანქანის შექმნა, რადგან ამ პოლიტიკურ ძალასთან შეუძლებელია თავისუფალი არჩევნების პირობებშიც კი კონკურენციის გაწევა.
– ოპოზიციამ ხელისუფლების სპექტაკლში მიიღო მონაწილეობა, სახელად არჩევნები, – განაცხადა შარტავამ, ამაზე რას იტყვით და ხომ არ ჯობდა "ფორუმის" მსგავსად არჩევნებისთვის ბოიკოტი გამოგეცხადებინათ?
– იცით, კახა შარტავას არასდროს არაფერი მოსწონდა და ახლაც ასეა, ვგულისხმობ ოპოზიციის ქმედებებს. ნუ, ეს მისი უფლებაა. შარტავა ყოველთვის გვაკრიტიკებს. ჩვენ მიგვაჩნია, რომ არჩევნებში არმონაწილეობა სწორი ნაბიჯი არ იქნებოდა, რადგან ასეთ შემთხვევაში არჩევნებში მონაწილეობას მხოლოდ ხელისუფლების სატელიტი პარტიები მიიღებდნენ და ხელისუფლებასაც მეტი სალაპარაკო ექნებოდა, რომ აი, ედპ, ქდმ და თორთლაძე ნამდვილი ოპოზიცია არისო. ახლა კი რეალურად გამოიკვეთა რამდენიმე ოპოზიციური ძალა, რომელზეც ხელისუფლება ვერ იტყვის, ხალხის მხარდაჭერა არა აქვთო, რადგან ჩვენ ხალხის მხარდაჭერა მივიღეთ და არსებული რეჟიმის მიმართ კრიტიკულად ვართ განწყობილი.
– არჩევნებამდე `ეროვნული საბჭო~ გამარჯვებაში დარწმუნებული იყო, თუმცა, არჩევნებმა ხომ არ გამოაჩინა, რომ რეალურად ოპოზიცია ძალიან სუსტია?
– ხელისუფლებას, რა თქმა უნდა, გაუხარდება, რომ ეს მართლა ასე იყოს, მაგრამ არჩევნების შედეგები საპირისპიროზე მეტყველებს. შედეგებით, რა თქმა უნდა, ოპოზიცია დამარცხდა, მაგრამ ამ შედეგებს არ ჰქვია, რომ ოპოზიცია გაკოტრდა. მმართველმა პარტიამ მის მიერ გაყალბებულ არჩევნებშიც კი სულ რაღაც 55%-ი აიღო.
– თქვენ მიიჩნევთ, რომ არჩევნები გაყალბდა? გაყალბების შემთხვევაში, თქვენ ამომრჩეველს ხმების დაცვას ჰპირდებოდით და მაშინ რატომ არ აპროტესტებთ შედეგებს?
– რა თქმა უნდა, არჩევნები გაყალბდა, ხელისუფლებისთვის თავისუფალი არჩევანის საფუძველზე ხმა არცერთ ადამიანს არ მიუცია.
მართალია, ჩვენ ხალხს ხმების დაცვას ვპირდებოდით, მაგრამ ხმების დაცვა ჰქვია იმას, როდესაც ხმებს საარჩევნო უბნებზე აყალბებენ. ასეთ გაყალბებას კი ადგილი არ ჰქონია. ადგილი ჰქონდა ხალხის დაშინებას და ზეწოლას. მხოლოდ და მხოლოდ ამიტომ შემოხაზა საზოგადოების უმრავლესობამ 5 ნომერი.
– არჩევნებში მონაწილე ოპოზიციური პარტიები მიიჩნევენ, რომ არჩევნები არ გაყალბებულა, გაყალბებაზე მხოლოდ თქვენ საუბრობთ... იცით, მუსირებს აზრი, რომ თქვენ არჩევნებში მონაწილეობით ხელისუფლებას არჩევნები "გაუპრავეთ", ამაზე რას იტყვით?
– უგულავას საზოგადოების მხარდაჭერის იმედი რომ ჰქონოდა, 30%-იან ბარიერს არ შემოიღებდა. საუბრები ხელისუფლების რეიტინგულობაზე და მხარდაჭერის ქონაზე არის ილუზია და მეტი არაფერი. ხელისუფლებამ როგორც მიიღო ხმები, ყველასთვის ნათელია და ჩვენ ამაზე უკვე ვისაუბრეთ. არ მიმაჩნია, რომ საზოგადოებაში ასეთი აზრი მუსირებს. ასეთ აზრს ავრცელებს ხელისუფლება და ეს ოპოზიციის დისკრედიტაციის გეგმის ერთ-ერთი ნაწილია.
– თქვენ აღნიშნეთ, რომ დამარცხების ერთ-ერთი მიზეზი ერთიანი კანდიდატის არყოლა იყო, არჩევნებმა გამოაჩინა, რომ ოპოზიციაში ყველაზე რეიტინგული ალასანიაა, არ მიგაჩნიათ, რომ მის ირგვლივ არგაერთიანებით შეცდომა დაუშვით?
– იცით, ამაზე პოლემიკა არაერთხელ გამართულა და ახლა ამაზე მიბრუნება ძალიან დაგვიანებულია. ყველას კარგად ახსოვს, რომ რეალურად ჩვენ გვქონდა მცდელობები ალასანიას ირგვლივ გაერთიანებისა, რაზეც უარი ითქვა სხვა ოპოზიციური პარტიების მხრიდან.
"ყველა მინუს ნოღაიდელი" – ეს უკვე ნიშნავს იმას, რომ ერთიანობა არ გსურს. ერთიანობა გულისხმობს იმას, რომ მინუსი არ უნდა იყოს.
– არჩევნების გაყალბების შემთხვევაში, ხელ-ფეხის დამტვრევით და დაანონსებული აქციებით იმუქრებოდით, თუმცა, ჩვენი ინფორმაციით, აქციები არ იქნება, რატომ გადაიფიქრეთ?
– ხელ-ფეხის დამტვრევას რაც შეეხება, ეს ერთი კონკრეტული ადამიანის სიტყვებია და პასუხიც მას უნდა მოსთხოვოთ. ეს ნოღაიდელის კონკრეტული პოზიცია იყო და არა "ეროვნული საბჭოსი".
– "გაყალბების შემთხვევაში, პარლამენტშიც კი შევიჭრები" – თქვენი სიტყვებია, აღარ აპირებს კუკავა პარლამენტში შეჭრას?
– გაყალბების შემთხვევაში პარლამენტში შევიჭრები-მეთქი არ მითქვამს. მე არაერთხელ მითქვამს, რომ ეს შეიძლება გახდეს ხელისუფლების შეცვლის ერთ-ერთი ფორმა. პარლამენტში შეჭრა ძალაში რჩება, უბრალოდ, ყველაფერს თავისი დრო აქვს. დღეს არ არის ის ვითარება, როდესაც შეიძლება ოპოზიცია პარლამენტში შეიჭრას, მაგრამ შეიძლება მალე დადგეს კიდეც. დღეს არის ვითარება, როდესაც ოპოზიციას გაძლიერება, რესურსების მოძიება, მობილიზაცია, დაკარგული პოზიციების აღდგენა სჭირდება და ამ მიმართულებით ადგილობრივი არჩევნები წინგადადგმული ნაბიჯია. როდესაც მოვა იმის დრო, რომ ხელისუფლება შეიცვალოს, ამის ფორმასაც მოვძებნით. შეიძლება ეს პარლამენტში შეჭრაც იყოს.
რაც შეეხება იმას, თუ რას ვაპირებთ, ჩვენ შევეცდებით, რომ `ეროვნულ საბჭოში~ რადიკალურად განწყობილ საზოგადოების დიდ ნაწილს მოვუყაროთ თავი. რაც მთავარია, საზოგადოებამ დაინახა, ვინ არის რეალურად შეურიგებელი ოპოზიცია. ზაფხული ორგანიზებული საკითხების მოგვარებას დასჭირდება.
– როგორ აფასებთ სუბარის გადაწყვეტილებას, ვგულისხმობ მისი "ალიანსიდან" წასვლას...
–არ ვიცი. რეალურად რატომ წავიდა სუბარი ალიანსიდან, თუმცა, ვფიქრობ, რომ სწორი გადაწყვეტილება მიიღო. ჩემი აზრით, სოზარისნაირი ადამიანების, ანუ ისეთი ადამიანების ადგილი, რომლებიც რეალურად ხელისუფლების შეცვლას ისახავენ, "ეროვნულ საბჭოშია".
– და "ალიანსი" არ ისახავს ხელისუფლების შეცვლას?
– "ალიანსს" განსხვავებული გეგმა აქვს. მათ სურთ, ნაბიჯ-ნაბიჯ, ისე, რომ შეიძლება ამას წლები და ათწლეულები დასჭირდეს, გაიმყარონ საკუთარი პოზიციები, მაგრამ მოყვება თუ არა ამას ხელისუფლების შეცვლა, ეს არავინ იცის. რაც შეეხება პირდაპირი მნიშვნელობით და მოკლე გზით ხელისუფლების შევცლას, ეს მხოლოდ `ეროვნული საბჭოს~ პრიორიტეტია...
–"ფორუმი" საარჩევნო გარემოს შესაცვლელად ნოღაიდელის გარდა ყველა ოპოზიციონერთან აპირებს კონსულტაციების დაწყებას, როგორ წარმოგიდგენიათ "ფორუმთან" თანამშრომლობა?
– ჩვენ, "ფორუმის" ინიციატივას საარჩევნო გარემოს შეცვლასთან დაკავშირებით მივესალმებით, თუმცა არანაირ ულტიმატუმს, რასაც არ უნდა უკავშირდებოდეს ის, არ მივიღებთ. თუ ეს ულტიმატუმი ძალაში დარჩება, რა თქმა უნდა, "ეროვნული საბჭო" "ფორუმთან" არ ითანამშრომლებს.
მსგავსი სიახლეები
კომენტარი