ASB საქართველო კატასტროფის რისკის შემცირების საკითხებში კერძო სექტორის ჩართულობაზე CSR კლუბის წევრებს შეხვდა

მიმდინარე წლის 22 მარტს, სასტუმრო იოტაში, კამპანიის „ჩვენ მზად ვართ“ ფარგლებში, გერმანული საერთაშორისო ორგანიზაცია არბაითერ-სამარიტერ-ბუნდი(ASB), CSR კლუბის წევრებს შეხვდა თემაზე: კერძო სექტორის ჩართულობა და კორპორაციული პასუხისმგებლობა კატასტროფის რისკის შემცირების საკითხებში.

შეხვედრაში მონაწილეობა მიიღეს კორპორაციული სოციალური პასუხისმგებლობის კლუბის წევრებმა, კატასტროფის რისკის შემცირების ექსპერტებმა, საგანგებო სიტუაციების მართვის სამსახურის წარმომადგენლებმა.

შეხვედრაზე იმსჯელეს, თუ როგორ უნდა ჩაერთოს კერძო სექტორი კატასტროფის რისკის შემცირების საკითხებში.

„m² უძრავი ქონების“ წარმომადგენელმა ისაუბრა ASB-სა და m2-ის წარმატებული ურთიერთთანამშრომლობის მაგალითზე.

აღნიშნული შეხვედრა ჩატარდა საერთაშორისო არასამთავრობო ორგანიზაცია არბაითერ-სამარიტერ-ბუნდის (ASB) მიერ, ევროპის სამოქალაქო დაცვისა და ჰუმანიტარული დახმარების ოპერაციების გენერალური დირექტორატის ფინანსური მხარდაჭერით, DIPECHO IV ფაზის მიმდინარე პროექტის „ჩვენ მზად ვართ! განათლება უსაფრთხოებისთვის, კატასტროფის რისკის შემცირება ინკლუზიური მიდგომით“ ფარგლებში.

პროგრამის მთავარი მიზანია: კატასტროფის რისკის შემცირების თემატიკის აქტუალიზაცია და ინსტიტუციონალიზაცია საგანმანათლებლო სექტორში, სასწავლო კურსის დანერგვა სამიზნე უნივერსიტეტებში, ასევე, შეზღუდული შესაძლებლობის მქონე პირთა საკითხებზე მომუშავე ორგანიზაციების შესაძლებლობების ამაღლება და მათი აქტიური მონაწილების უზრუნველყოფა კატასტროფების რისკის შემცირების საკითხებში.

1996 წელს დაწყებული კატასტროფის რისკისადმი მზაობის ECHO–ს პროგრამა (DIPECHO) წარმოადგენს ECHO–ს კატასტროფის რისკის შემცირების გლობალური მცდელობის მთავარ კომპონენტს, რომელზეც 325 მილიონი ევროა გამოყოფილი. პროგრამის მთავარი მიზანია საზოგადოების მდგრადობის გაძლიერება და მოწყვლადობის შემცირება. DIPECHO არის ადამიანებზე ორიენტირებული პროგრამა, რომელიც ეხმარება კატასტროფის რისკის ქვეშ მცხოვრებ მოსახლეობას ტრენინგის საშუალებით კატასტროფისადმი მზაობის გაძლიერებაში, ასევე ადრინდელი შეტყობინების სისტემების დანერგვაში და გაუთვალისწინებელი შედეგების მიმართ რეაგირების დაგეგმვაში. იგი აგრეთვე ხელს უწყობს მოქალაქეების, სამოქალაქო ჯგუფების, ადგილობრივი, რეგიონალური და სახელმწიფო ორგანიზაციების ეფექტურ თანამშრომლობას.