5-6 სექტემბერს ზღვისპირა ქალაქმა "ბათუმობა" იზეიმა

5-6 სექტემბერს ზღვისპირა ქალაქში "ბათუმობის" დღესასწაული აღინიშნა. წლვანდელი "ბათუმობა" საინტერესო ღონისძიებებითა და მრავალფეროვნებით იყო გამორჩეული. ამავე დროს, ღონისძიებები ყველა ასაკისა და გემოვნების ბათუმელსა და მის სტუმარზე მორგებული.

5-6 სექტემბერს "ბათუმობის" ფარგლებში დუმბაძისა და მემედ აბაშიძის ქუჩები საგანგებოდ იქნა მორთული, სადაც სასულე ორკესტრის მსვლელობა, პანტომიმის თეატრისა და თითების თეატრის წარმოდგენები, სამეჯლისო ცეკვები გაიმართა და ადგილობრივი ბიზნესის გამოფენა მოეწყო. ევროპის მოედანზე აჭარის ტურიზმისა და კურორტების დეპარტამენტის ორგანიზებით ჩატარდა ფესტივალი "განდაგანა", რომლის ძირითადი თემატიკა იყო აჭარული სოფელი, მთელი თავისი ხიბლითა და კოლორიტულობით. ქუჩების შესასვლელი მოეწყო ისე, როგორც აჭარულ სოფლებშია. მთლიანი ტერიტორია კი სოფლის ერთი დიდი ეზო იყო, ხის ორღობეებითა და სოფელთან ასოცირებული სხვადასხვა დეკორაციის გამოყენებით. მიწის ნაცვლად ზოგიერთი ადგილი თივით დაფარა. ევროპის მოედანზე განთავსდა ასევე სახლის მაკეტი. ფესტივალი მუსიკალურად ადგილობრივმა ფოლკლორულმა ჯგუფებმა გააფორმეს. საღამოს კი ღონისძიებას ადგილობრივი ეთნო-ჯაზ, ეთნო-როკ და პოპ ბენდები შეუერთდნენ. გაიმართა თამაშობები და თემატური შეჯიბრებები: მაგალითად, შეჯიბრი სიმინდის სწრაფად დარჩევაში, ბაგირის გადაწევაში და ასე შემდეგ. ჩატარდება მასტერკლასები: მონაწილეებმა შეძლეს ყველის ამოყვანა, თათარას გაკეთება და ჩურჩხელის ამოვლება.ერთი სიტყვით, სტუმრებს ქალაქიდან გაუსვლელად შესაძლებლობა მიეცათ მთიან აჭარაში ემოგზაურათ.

"ბათუმობაზე" არც ბავშვები დარჩენილან უყურადღებოდ, მათ ბულვარის კოლონადებთან გასართობი მიუზიკლით "ზეიმი ჯადოსნურ სასახლეში" უმასპინძლეს.

ქალაქის მერმა გიორგი ერმაკოვმა საპატიო ბათუმელებიც დაასახელა: მუსიკოსი ლაშა ღლონტი, ექიმი ავთანდილ დიასამიძე, სპორტსმენი გია ჯორბენაძე, პედაგოგი დალი ჭილიძე, არქიტეტქორი ელგუჯა ცივაძე და არქეოლოგი ამირან კახიძე. დაჯილდოვების ცერემონიალი მუსიკალურ ცენტრში გაიმართა, სადაც დაჯილდოების შემდეგ, ეროვნულმა სიმფონიურმა ორკესტრმა, ნიკა რაჭველის დირიჟორობით, პროექტი „მსოფლიო კინომუსიკის შედევრები“ წარმოადგინა. ბათუმში პროექტი პირველად იყო წარმოდგენილი. რამდენიმე სიმღერა, ორკესტრის თანხლებით, მომღერალმა ანიტა რაჭველიშვილმა შეასრულა. პროგრამაში იყო ჩარლი ჩაპლინის, ნინო როტას, მიშელ ლეგრანის, ლალო შიფრინისა და გია ყანჩელის ნაწარმოებები.

ორი დღის განმავლობაში ანბანის კოშკის მიმდებარედ ფლამენკოს ცნობილმა ანდალუზიელმა მოცეკვავემ და ქორეოგრაფმა ხოსე კანდელამ სპეციალური შოუ გამართა. ანბანის კოშკთან საღამო უფასო კონცერტებმაც მოიცვა, მათ შორის იყვნენ ბათუმური ჯგუფები: „Black Sea“, „Strawberry fields“, „The Nemo“, „Sound lab“, „Rene Band“, ასვე მებო ნუცუბიძე და ჯგუფი "BEARFOX". „ბათუმობა“ გალა კონცერტით დასრულდა. კონცერტში მონაწილეობდნენ: კვარტეტი „ნოტა“, ხვიჩა მაღლაკელიძის კვარტეტი, ანსამბლი „ბათუმი“, აჩიკო ბერიძის კვარტეტი, ნანა მესხი, ლაშა ღლონტი, თეატრალური კვარტეტი, ჯგუფი „ფრანი“ და კაროლინა ჩერნეცკა.

პროექტი „ჰით ბათუმი“ 11 კვირისგან შედგება და თოთოეული კვირა სხვადასხვა მიმართულების არტს მოიცავს. მრავლფეროვანი პროგრამა გათვლილია ყველა თაობისა და გემოვნების ადამიანისთვის. შესაბამისად, დამსვენებლებს შესაძლებლობა აქვთ, საკუთარი ინტერესებიდან გამომდინარე, დაგეგმონ ბათუმში დასვენებისა და გართობის დღეები.

„ჰით ბათუმის“ ფარგლებში, 2 თვის განმავლობაში დაგეგმილია 200-ზე მეტი ღონისძიება, ამ პერიოდის განმავლობაში ბათუმს 20-მდექვეყნიდან 259 უცხოელი არტისტი სტუმრობს. ღონისძებაში ჩართულია 50 ორგანიზაცია და 2000-მდე მონაწილე.

„ჰით ბათუმი 2015“ წარმოადგენს ბათუმის საზაფხულო სეზონის სპეციალურ პროექტს, რომელიც თავის თავში მოიცავს 2 თვიანი პერიოდის განმავლობაში სხვადასხვა მიმართულების ფესტივალებისა და გასართობი ღონისძიებების ჩატარებას უწყვეტ რეჟიმში. 6 ივლისიდან 15 სექტემბრამდე, ყოველ კვირას, ბათუმში ჩატარდება განსხვავებული ტიპის ივენთები, რომლის კომუნიკაციაც მოხდება ერთიანი ქოლგის ქვეშ, სახელწოდებით „ჰით ბათუმი“.

პროექტის განმახორციელებელია ბათუმის მერია და საკრებულო, ასევე მის განხორციელებაში ჩართულები არიან კულტურისა და ძეგლთა დაცვის სამინისტრო და მისი სსიპი „კულტურის განვითარების საინვესტიციო ფონდი“, ტურიზმის ეროვნული ადმინისტრაცია და აჭარის ტურიზმის დეპარტამენტი. პროექტი „ჰით ბათუმი“ სახელმწიფო პროექტს წარმოადგენს, რომლის მიზანია ერთის მხრივ აჭარის ტურისტული პოტენციალის, ხოლო მეორეს მხრივ მთლიანად ქვეყნის პრომოუშენი გარე და შიდა აუდიტორიაში.