რუსეთი კიევის საცხოვრებელ უბნებს ბომბავს - ლუგანსკში მოქალაქეების ევაკუაციის მიზნით შესულ ავტობუსებს ცეცხლი გაუხსნეს
რუსეთი კიევის საცხოვრებელ უბნებს ბომბავს. პრეზიდენტი ზელენსკი მოსახლეობას განსაკუთრებულ სიფრთხილეს ურჩევს.
„თავდაცვის მიზნით, მოიმარაგეთ მოლოტოვის კოქტეილები და საჭიროების შემთხვევაში გამოიყენეთ" - ასეთია ოფიციალური პირების მოწოდებები.
ცოტა ხნის წინ ცნობილი გახდა, რომ რუსებმა ცეცხლი გაუხსნეს ავტობუსებს, რომლებიც ლუგანსკის ოლქში მშვიდობიანი მოქალაქეების ევაკუაციის მიზნით შედიოდნენ. ამ წუთებში, ზუსტდება დაღუპულებისა და დაშავებულების შესახებ ინფორმაცია.
უკრაინის პრეზიდენტის მრჩეველი მიხაილო პოდოლიაკი აცხადებს, რომ ქვეყანა მოხალისეების იმედად არის.
„გაგაცნობთ ამ დროისთვის არსებულ მდგომარეობას - ბანკები დაკეტილია, თუმცა ღია რჩება სახელმწიფო საბანკო ცენტრი. დახურულია ფილიალები იქ, სადაც საომარი მოქმედებები მიმდინარეობს; შეუფერხებლად მიმდინარეობს ელექტროენერგიისა და წყლის მიწოდება; ყველა პორტი დახურულია, დაკეტილია ცა; უკრაინის ავიახაზები უმეტესწილად ჩვეულ რეჟიმში მუშაობს; არის საწვავის დეფიციტი - გეუბნებით იმას, რაც რეალურად ხდება. მოხალისეების იმედად ვართ! ყველა ინფრასტრუქტურული ობიექტი სახელმწიფო კონტროლის ქვეშაა. რუსეთის ფედერაციის ერთადერთი მიზანი უკრაინის პრეზიდენტისა და ქვეყნის პოლიტიკური ხელმძღვანელობის განადგურებაა,"- აცხადებს პოდოლიაკი.
მსგავსი სიახლეები
კომენტარი