გარდაცვლილი 4 წლის გოგონას დედას შემაკავებელი ორდერი ჰქონდა გამოწერილი, რომელსაც არღვევდა

სანზონაში 4 წლის გარდაცვლილი გოგონას საქმეზე შინაგან საქმეთა სამინისტრო განცხადებას ავრცელებს.

უწყების მიერ გამოქვეყნებულ წერილში ნათქვამია, რომ გარდაცვლილი ბავშვის მიმართ შესაძლო ძალადობის ფაქტის შესახებ შსს-ში შეტყობინება 6 იანვარს შევიდა, რა დროსაც მცირეწლოვანის დედა დააკავეს.

უწყების განცხადებაში ნათქვამია, რომ დედის მიმართ შემაკავებელი ორდერი იქნა გამოწერილი, რომლის მიხედვითაც, ქალს შვილთან კონტაქტი ეკრძალებოდა.

4 წლის მცირეწლოვანის გარდაცვალების მიზეზის დასადგენად საგამოძიებო მოქმედებები ტარდება.

შინაგანს საქმეთა სამინისტრომ მოკვლევა დაიწყო ასევე იმაზე, თუ როგორ აღმოჩნდა ბავშვი მშობელთან. დაწყებულია სამსახურეობრივი შემოწმება, რამდენად ადეკვატურად ხორციელდება მონიტორინგი.

„შინაგან საქმეთა სამინისტროს ქალაქ თბილისის პოლიციის დეპარტამენტის გლდანი-ნაძალადევის სამმართველომ მიმდინარე წლის 22 იანვარს, თბილისში 2014 წელს დაბადებული გოგონას გარდაცვალების ფაქტზე გამოძიება სისხლის სამართლის კოდექსის 116-ე მუხლით დაიწყო, რაც გაუფრთხილებლობით სიცოცხლის მოსპობას გულისხმობს.

გამოძიების ფარგლებში დაკავებულია არასრულწლოვნის დედა, სისხლის სამართლის კოდექსის 381-ე პრიმა მუხლით, რაც შემაკავებელი ან დამცავი ორდერით გათვალისწინებული მოთხოვნებისა და ვალდებულებების შეუსრულებლობას გულისხმობს.

ამ შემთხვევამდე შინაგან საქმეთა სამინისტროში გარდაცვლილი ბავშვის მიმართ ოჯახში შესაძლო ძალადობის ფაქტებზე შეტყობინება ერთხელ, 6 იანვარს შევიდა. ფიზიკური ძალადობის შესაძლო ფაქტზე, სსკ-ის 126-ე პრიმა მე-2 მუხლის ,,ა" ქვეპუნქტით დაიწყო გამოძიება. შეტყობინების საფუძველზე ოჯახში მისულმა საპატრულო პოლიციის თანამშრომლებმა დაუყოვნებლივ დააკავეს მცირეწლოვანის დედა ლ. ქ.

თავად მცირეწლოვანი კი პოლიციამ სავადმყოფოში გადაიყვანა და მომხდარის შესახებ ეცნობა სოციალურ სამსახურს.

საქმეზე გამოიკითხა ბრალდებული და არაერთი მოწმე, მათ შორის ოჯახის წევრები, შეტყობინების ინიციატორი და პოლიციის თანამშრომლები. გამოკითხულმა მოწმეებმა უარყვეს ბავშვის მიმართ დედის მხრიდან რაიმე ფორმით ძალადობა. ოჯახის წევრების განცხადებით, ბავშვზე არსებული დაზიანებები გამოწვეული იყო მისი ჰიპერაქტიური ქცევით.

ბრალის წარდგენის მტკიცებულებითი სტანდარტის არარსებობის მიუხედავად მის მიმართ პოლიციის მიერ გამოიწერა შემაკავებელი ორდერი, რომლის მიხედვით დედას ეკრძალებოდა არასრულწლოვანთან კონტაქტი.

22 იანვარს მომხდარი ფაქტის შემდეგ ლ.ქ. ორდერის დარღვევისთვის პოლიციამ სისხლის სამართლის წესით დააკავა.

შინაგან საქმეთა სამინისტროში გენერალური ინსპექციის მიერ პარალელურად დაწყებულია შესწავლა და სამსახურეობრივი შემოწმება, რომელიც დაადგენს მიმდინარეობდა თუ არა ეფექტიანად შემაკავებელი ორდერის მონიტორინგი.

მცირეწლოვანის გარდაცვალების ზუსტი მიზეზის დადგენის მიზნით, ტარდება საგამოძიებო ღონისძიებები, დანიშნულია სასამართლო-სამედიცინო ექსპერტიზა,“ - ნათქვამია განცხადებაში.