ბათუმში საერთაშორისო მუსიკალური ფესტივალი იწყება
10-15 სექტემბერს ბათუმში საერთაშორისო მუსიკალური ფესტივალი გაიმართება. დღეს, 10 სექტემბერს 19:00 საათზე ფესტივალი ბათუმის მუსიკალურ ცენტრში ფრანგული საღამოთი გაიხსნება.
ზაქარია ფალიაშვილის სახელობის თბილისის ოპერისა და ბალეტის თეატრის ორკესტრს საფრანგეთიდან ჩამოსული ცნობილი დირიჟორი ლორან პეტიჟირარი უდირიჟორებს. სოლისტი პიანისტი, იუნესკოს მშვიდობის არტისტი, ბათუმის საერთაშორისო მუსიკალური ფესტივალის დამფუძნებელი და სამხატვრო ხელმძღვანელი ელისო ბოლქვაძე იქნება. შესრულდება ლორან პეტიჟირარის „მარტოსული“, ცეზარ ფრანკის სიმფონია რე-მინორი და პეტრე ჩაიკოვსკის საფორტეპიანო პირველი კონცერტი, სი-ბემოლ მინორი, პირველი ნაწილი.
ბათუმის საერთაშორისო მუსიკალური ფესტივალის გახსნას დღეს საქართველოს პრეზიდენტი გიორგი მარგველაშვილი დაესწრება. სწორედ პრეზიდენტის პატრონაჟით ელისო ბოლქვაძის საქველმოქმედო ფონდი „ლირა“ BATUMI MUSIC FEST-ს მესამე წელია ატარებს.
ფესტივალში მონაწილეობენ მსოფლიოში აღიარებული მუსიკოსები სხვადასხვა ქვეყნიდან - საფრანგეთიდან, ავსტრიიდან, აშშ-დან, ისრაელიდან, იაპონიიდან, თურქეთიდან, აზერბაიჯანიდან, ასევე თბილისის ოპერისა და ბალეტის თეატრის ორკესტრი. შესრულდება კლასიკური მუსიკის შედევრები.
დასკვნითი საღამო 15 სექტემბერს პიაცაზე გაიმართება, სადაც თავად ელისო ბოლქვაძე დაუკრავს. სპეციალურად ფესტივალისთვის საქართველოში ჩამოდის ლეგენდარული ტენორი ზურაბ სოტკილავა. კლასიკურ მუსიკასთან ერთად იქნება ფოლკლორიც, ანსამბლი „ქართული ხმები“ ქართულ ხალხურ სიმღერებს შეასრულებს.
ფესტივალის დასკვნითი გალა-კონცერტი იუნესკოს 70 წლის იუბილეს მიეძღვნება და ბათუმის პიაცაზე გაიმართება. მას დაესწრებიან იუნესკოს წარმომადგენლები საფრანგეთიდან, საქართველოს ხელისუფლება, დიპლომატიური კორპუსი. კონცერტიდან შემოსული თანხა კი გადაირიცხება სირიაში ომის შედეგად დაზარალებული ბავშვების საგანმანათლებლო პროგრამებისთვის UNESCO-ს ეგიდით შექმნილ დახმარების ფონდში.
ბათუმის მუსიკალურ ფესტივალს საგანმანათლებლო ფუნქციაც აქვს. ფესტივალის ფარგლებში ჩატარდება მასტერ-კლასები ახალგაზრდა მუსიკოსებისთვის, 14 სექტემბერს კი ფესტივალის ფარგლებში ნორჩი ტალანტების მონაწილეობით გალა კონცერტი გაიმართება და საუკეთესოს მსმენელის სიმპატიის პრიზი გადაეცემა.
დაარსების დღიდან ბათუმის მუსიკალური ფესტივალის მხარდამჭერია საქართველოს კულტურისა და ძეგლთა დაცვის სამინისტრო, აჭარის ავტონომიური რესპუბლიკის მთავრობა, ფრანგული ინსტიტუტი საქართველოში და საფრანგეთის საელჩო. 2015 წელს ბათუმის მუსიკალური ფესტივალი თანამშრომლობს აზერბაიჯანისა და თურქეთის საელჩოებთან. ბათუმის მუსიკალური ფესტივალით დაიხურება“ჰით ბათუმი 2015“ პროგრამა.
პროექტი „ჰით ბათუმი“ 11 კვირისგან შედგება და თოთოეული კვირა სხვადასხვა მიმართულების არტს მოიცავს. მრავლფეროვანი პროგრამა გათვლილია ყველა თაობისა და გემოვნების ადამიანისთვის. შესაბამისად, დამსვენებლებს შესაძლებლობა აქვთ, საკუთარი ინტერესებიდან გამომდინარე, დაგეგმონ ბათუმში დასვენებისა და გართობის დღეები.
„ჰით ბათუმის“ ფარგლებში, 2 თვის განმავლობაში დაგეგმილია 200-ზე მეტი ღონისძიება, ამ პერიოდის განმავლობაში ბათუმს 20-მდექვეყნიდან 259 უცხოელი არტისტი სტუმრობს. ღონისძებაში ჩართულია 50 ორგანიზაცია და 2000-მდე მონაწილე.
„ჰით ბათუმი 2015“ წარმოადგენს ბათუმის საზაფხულო სეზონის სპეციალურ პროექტს, რომელიც თავის თავში მოიცავს 2 თვიანი პერიოდის განმავლობაში სხვადასხვა მიმართულების ფესტივალებისა და გასართობი ღონისძიებების ჩატარებას უწყვეტ რეჟიმში. 6 ივლისიდან 15 სექტემბრამდე, ყოველ კვირას, ბათუმში ჩატარდება განსხვავებული ტიპის ივენთები, რომლის კომუნიკაციაც მოხდება ერთიანი ქოლგის ქვეშ, სახელწოდებით „ჰით ბათუმი“.
პროექტის განმახორციელებელია ბათუმის მერია და საკრებულო, ასევე მის განხორციელებაში ჩართულები არიან კულტურისა და ძეგლთა დაცვის სამინისტრო და მისი სსიპი „კულტურის განვითარების საინვესტიციო ფონდი“, ტურიზმის ეროვნული ადმინისტრაცია და აჭარის ტურიზმის დეპარტამენტი. პროექტი „ჰით ბათუმი“ სახელმწიფო პროექტს წარმოადგენს, რომლის მიზანია ერთის მხრივ აჭარის ტურისტული პოტენციალის, ხოლო მეორეს მხრივ მთლიანად ქვეყნის პრომოუშენი გარე და შიდა აუდიტორიაში.
მსგავსი სიახლეები
კომენტარი