მკვლელობა ვაზისუბანში - ახალგაზრდა მამაკაცი ცეცხლსასროლი იარაღით მოკლეს

ვაზისუბანში ახალგაზრდა მამაკაცი მოკლეს. არსებული ინფორმაციით, დაუდგენელმა პირმა მამაკაცს ცეცხლსასროლი იარაღით რამდენიმე ჭრილობა მიაყენა და შემთხვევის ადგილიდან მიიმალა, დაჭრილი კი საავადმყოფოში მიყვანის შემდეგ გარდაიცვალა. შემთხვევაზე განზრახ მკვლელობის მუხლით გამოძება უკვე დაიწყო.

„ჩადენილი დანაშაული 7-დან 15 წლამდე ვადით თავისუფლების აღკვეთას ითვალისწინებს. პირველადი ინფორმაციით, 1988 წელს დაბადებულ, წარსულში ნასამართლევ ხ.მ.-ს დაუდგენელმა პირმა ცეცხლსასროლი იარაღიდან გასროლით რამდენიმე ჭრილობა მიაყენა და შემთხვევის ადგილიდან მიიმალა. დაჭრილი ხ.მ. დაუყოვნებლივ იქნა გადაყვანილი საავადმყოფოში. იგი სამკურნალო დაწესებულებაში მიყვანის შემდეგ, მიყენებული ჭრილობების შედეგად, მალევე გარდაიცვალა.

შინაგან საქმეთა სამინისტროს თბილისის პოლიციის დეპარტამენტის თანამშრომლები, დამნაშავის გამოვლენისა და დაკავების მიზნით, ინტენსიურ სამძებრო და საგამოძიებო მოქმედებებს აწარმოებენ. გამოძიება განზრახ მკვლელობის ფაქტზე, საქართველოს სსკ-ს 108-ე და 236-ე მუხლებით მიმდინარეობს“ - აცხადებენ შსს-ში.