Funk Off-ის ჯაზური ელემენტებით გაჯერებული მუსიკა ზღვისპირა ქალაქის ქუჩებში
30 და 31 აგვისტოს ბათუმის ქუჩებსა და ბულვარში იტალიური ჯგუფის Funk Off-ის ჯაზური ელემენტებით გაჯერებული მუსიკა მსმენელის აღტაცებას იწვევდა.
რაც მთავარია, დღეს ყველაზე მეტი იყო ემოციური სიმძაფრე და ემპათია. დარიო ჩეკინის ხელმძღვანელობით ქუჩებსა და პიაცის მიმდებარე ტერიტორიაზე მოძრავმა 15-მა მუსიკოსმა უფრო და უფრო მეტი ადამიანი მონუსხა.
ქუჩის მუსიკალური მსვლელობის შემდეგ იტალიური ბრას ბენდის მონაწილეობით 00:00 საათზე საფესტივალო კლუბ Take five-ში სპეციალური შოუ გაიმართა.
იტალიური ბრას ბენდი Funk Off 1998 წელს, იტალიის ქალაქ ვიკიოში დაფუძნდა. ჯაზის, ბლუზის, სოულის, ფოლკის, ლათინოსა და როკის ელემენტების ოსტატურად შეზავებული მიქსი ამ მუსიკალური ჯგუფის მთავარი განმასხვავებელი ნიშანია. უკვე 17 წელია Funk Off მსოფლიოს სხვადასხვა ქალაქის ქუჩებში მარშირებს და საზოგადოების აღფრთოვანებას იწვევს. დაარსებიდან დღემდე ჯგუფმა უკვე ხუთი ალბომი გამოსცა, ხლო მე-6 მომავალი წლის მაისიდან გაიყიდება. მოღვაწეობის ბოლოდროინდელ პერიოდში ბენდი უფრო მეტად იყენებს სოულის ელემენტებს და თანამშრომლობს ისეთ შემსრულებლებთან, როგორებიც არიან ევერი სანშაინი, რაულ მიდონი და ფრედ უესლი. მათი მე-6 ალბომი “Things Change” გარკვეულწილად ამ ცვლილებაზეც მიანიშნებს.
პროექტი „ჰით ბათუმი“ 11 კვირისგან შედგება და თოთოეული კვირა სხვადასხვა მიმართულების არტს მოიცავს. მრავლფეროვანი პროგრამა გათვლილია ყველა თაობისა და გემოვნების ადამიანისთვის. შესაბამისად, დამსვენებლებს შესაძლებლობა აქვთ, საკუთარი ინტერესებიდან გამომდინარე, დაგეგმონ ბათუმში დასვენებისა და გართობის დღეები.
„ჰით ბათუმის“ ფარგლებში, 2 თვის განმავლობაში დაგეგმილია 200-ზე მეტი ღონისძიება, ამ პერიოდის განმავლობაში ბათუმს 20-მდექვეყნიდან 259 უცხოელი არტისტი სტუმრობს. ღონისძებაში ჩართულია 50 ორგანიზაცია და 2000-მდე მონაწილე.
„ჰით ბათუმი 2015“ წარმოადგენს ბათუმის საზაფხულო სეზონის სპეციალურ პროექტს, რომელიც თავის თავში მოიცავს 2 თვიანი პერიოდის განმავლობაში სხვადასხვა მიმართულების ფესტივალებისა და გასართობი ღონისძიებების ჩატარებას უწყვეტ რეჟიმში. 6 ივლისიდან 15 სექტემბრამდე, ყოველ კვირას, ბათუმში ჩატარდება განსხვავებული ტიპის ივენთები, რომლის კომუნიკაციაც მოხდება ერთიანი ქოლგის ქვეშ, სახელწოდებით „ჰით ბათუმი“.
პროექტის განმახორციელებელია ბათუმის მერია და საკრებულო, ასევე მის განხორციელებაში ჩართულები არიან კულტურისა და ძეგლთა დაცვის სამინისტრო და მისი სსიპი „კულტურის განვითარების საინვესტიციო ფონდი“, ტურიზმის ეროვნული ადმინისტრაცია და აჭარის ტურიზმის დეპარტამენტი. პროექტი „ჰით ბათუმი“ სახელმწიფო პროექტს წარმოადგენს, რომლის მიზანია ერთის მხრივ აჭარის ტურისტული პოტენციალის, ხოლო მეორეს მხრივ მთლიანად ქვეყნის პრომოუშენი გარე და შიდა აუდიტორიაში.
მსგავსი სიახლეები
კომენტარი