ირაკლი კოვზანაძე : 2019 წელს სოციალურად ორიენტირებული ბიუჯეტი გვექნება
2019 წელს სოციალურად ორიენტირებული სახელმწიფო ბიუჯეტი გვექნება,- განაცხადა პარლამენტის საფინანსო-საბიუჯეტო კომიტეტის თავმჯდომარემ, ირაკლი კოვზანაძემ ტელეკომპანია „იმედის“ ეთერში.
მისი თქმით, ბიუჯეტის ასიგნებების მოცულობა 12 მილიარდ 997 მილიონი ლარით განისაზღვრა. ჯანმრთელობის, სოციალური დაცვისა და განათლების სფეროების დაფინანსების მოცულობა მომავალი წლის ბიუჯეტში 5 მილიარდ 490 მილიონ ლარს აღწევს; მათი წილი კი ფუნქციონალური კლასიფიკაციის მიხედვით, 47 %-ს აჭარბებს.
„2019 წლის სახელმწიფო ბიუჯეტში ჩადებულია პენსიების 20 ლარით, 200 ლარამდე გაზრდა, 2020 წლიდან ამ თანხას კიდევ 20 ლარი დაემატება. ამავე დროს, ხელისუფლება იძლევა პირობას, რომ მომავალში პენსიების ზრდა გარკვეული კორელაციაში იქნება ეკონომიკის ზრდასთან და ეს არის მნიშვნელოვანი“, - აღნიშნა კომიტეტის თავმჯდომარემ.
კოვზანაძის თქმით, პენსიების ზრდის პარალელურად, მომავალი წლიდან დაიწყება უმნიშვნელოვანესი რეფორმის - დაგროვებითი საპენსიო რეფორმის - განხორციელება, რისთვისაც ბიუჯეტის კანონპროექტში 90 მილიონი ლარია გათვალისწინებული.
კომიტეტის თავმჯდომარემ ისაუბრა სოციალური მიმართულებით გაზრდილ ხარჯებზე. მათ შორის, 70 მილიონ ლარზე, რომელსაც პრემიერ-მინისტრის ინიციატივით, 1-ლი იანვრიდან 144 ათასამდე სოციალურად დაუცველი ბავშვი 50-ლარიანი დახმარების სახით მიიღებს.
„გარდა ამისა, სახელმწიფო ბიუჯეტიდან 754 მილიონი ლარით დაფინანსდება საყოველთაო ჯანდაცვის პროგრამა. გამოყოფილია თანხები ასევე იმუნიზაციის, ცე-ჰეპატიტის ელიმინაციის, დიალეზის, აივ-ინფექციის, შიდსის, ფსიქიკური ჯანმრთელობისა და მთელ რიგ სხვა პროგრამებზე; შენდება აღნიშნული პროფილის ორი საავადმყოფო, დაფინანსდება სოფლის ექიმის, სასწრაფო დახმარებისა და ტრანსპორტირების, რეფერალური მომსახურების, ქრონიკული დაავადებების სამკურნალო მედიკამენტებით უზრუნველყოფის პროგრამები. ყველაფერი, რაც ჩამოვთვალე, პუნქტების მიხედვით არის გაწერილი სახელმწიფო ბიუჯეტში და ათეულობით მილიონ ლარს ითვლის“, - აღნიშნა ირაკლი კოვზანაძემ.
მსგავსი სიახლეები
კომენტარი