დაბრუნდება თუ არა "სანი" ჩემი ცოლის დაქალებში და შეყვარებულია თუ არა 21 წლის მსახიობი - დრონი.ჯი-ს ინტერვიუ გიორგი ტაბიძესთან

თეატრალურის მესამე კურსის სტუდენტმა, 21 წლის მსახიობმა გიორგი ტაბიძემ, „მეამბოხე ბიჭის“ სახის შექმნას თავი ისე კარგად გაართვა, რომ მალე დაიმსახურა მაყურებელის სიყვარული. ამიტომაც, სერიალიდან მისი გმირის გაქრობამ, ბევრ ადამიანს გული ძალიან დასწყვიტა.

დრონი.ჯი მსახიობის სერიალიდან გაქრობის მიზეზით, მისი პირადი ცხოვრებით და სამომავლო გეგმებით დაინტერესდა.

გთავაზობთ ინტერვიუს ახალგაზრდა, ნიჭიერ და სიმპათიურ მსახიობ გიორგი ტაბიძესთან.

- გიორგი „ჩემი ცოლის დაქალებში“ მოხვედრამდე შენ მონაწილეობას იღებდი ფილმში „ჩემი ბედნიერი ოჯახი“ - როგორ ფიქრობ, ეს ფილმი ისეთივე წარმატებული იყო შენს ცხოვრებაში, როგორც „სანის“ როლი?

- წარმატების მხრივ, ფილმმა უფრო მეტი წარმატება მომიტანა, ბერლინალეს კინოფესტივალზე გავედით, ასევე სხვა საერთაშორისო პრიზები ავიღეთ. ფილმი დამეხმარა იმაში, რომ თუნდაც ამ სერიალში მოვხვდი. „სანის“ პერსონაჟმაც მომიტანა წარმატება და „ჩემი ცოლის დაქალები“, რომ არ ყოფილიყო, ალბათ ხალხის ცნობადობაც არ მექნებოდა, წარმატებასაც ვერ მივაღწევდი, როგორც ახლა, მაგრამ პირველი ნაბიჯი წარმატებისკენ ფილმი იყო.

- შენი აზრით, სამსახიობო კარიერის რა ეტაპზე ხარ?

- დიდი იმედი მაქვს, რომ ეს ყველაფერი დასაწყისია და უფრო მეტ პროექტზე ვიმუშავებ მომავალში.

- გამოჩნდები თუ არა „ჩემი ცოლის დაქალებში“ და ექნება თუ არა შენს გმირს გაგრძელება?

- ამაზე პასუხი არ მაქვს, ზუსტად მეც არ ვიცი.

- გული დაგწყდა, როდესაც სანის წასვლა მოუწია?

- არ მინდა მაყურებლისთვის მოსაბეზრებელი გავხდე, რა თქმა უნდა იყო გულის წყვეტა, ჩემი პირადი საქმეების გამო მომიწია რაღაც პერიოდი უარი მეთქვა სერიალზე და ამის გამო ძალიან მწყდება გული.

- გყავს თუ არა სინამდვილეში გლდანელი ძმაკაცები?

- გლდანელი არა თემქელები კი. (იცინის)

- „ჩემი ცოლის დაქალებში” გამოჩენის დღიდან გოგოების ყურადღება მიიპყარი, ეს გათამამებს?

- არა სხვათაშორის, ისევ ისეთი ვარ, როგორიც მანამდე ვიყავი. მოიმატეს თაყვანისმცემლებმა, მაგრამ ჩემში არაფერი შეცვლილა, ისევ ისეთ ურთიერთობას ვიჭერ, როგორც აქამდე.

- ახლა რითი ხარ დაკავებული?

- ახლა სამი პრემიერისთვის ვემზადები თეატრებში.

- ხარ თუ არა შეყვარებული?

- არა, ჩემი გული თავისუფალია. (იცინის)

- როგორ ქალებს ანიჭებ უპირატესობას?

- კონკრეტული პასუხი არ მაქვს ამ კითხვაზე, მაგრამ გარეგნულად შავგრემან გოგოებს ვანიჭებ უპირატესობას, მომწონს გოგოს როცა განსხვავებული თვალის ჭრილი აქვს, თვალებზე ვგიჟდები. აუცილებელია ურთიერთობაში პატივისცემა და ნდობა. არ მომწონს აცანცარებული გოგოები, რომლებიც ზედმეტად გაწუხებენ. მირჩევნია გოგომ ერთი საათის განმავლობაში ხმა არ ამოიღოს და ერთი რამე თქვას ჭკვიანური, ვიდრე ლაპარაკობდეს სულ და თან სისულელეებს. ამოუცნობი გოგოები მომწონს და ვიწყებ მათთან ურთიერთობას, როცა არ გაჩვენებს შენს ნამდვილ სახეს და შენ უნდა გამოიძიო, მაგრამ ისიც თუ ხვდები რომ გამოძიებად ღირს.

- სექსი თუ სიყვარული?

- სიყვარული წარმოშობს საყვარელ ადამიანთან ზუსტად ამ ურთიერთობას და ეგრეც უნდა იყოს. უბრალო სექსი, რა თქმა უნდა, სიყვარულს არ ჯობია. რა არის იმაზე უკეთესი, როცა ადამიანი გიყვარს და ყოველდღიურ სიამოვნებას იღებ მასთან ურთიერთობით.

- ჩვენ ვიცით, რომ სამი წელი იყავი შეყვარებული. რა შეგიძლია მოგვიყვე ამ ურთიერთობაზე და რატომ მოხდა თქვენი დაშორება?

- ძალიან კარგი სამი წელი გავიარე ამ ადამიანთან ერთად, უბრალოდ ბოლოს საერთო შეცდომების გამო მოხდა ჩვენი დაშორება, ბევრი რამე ვისწავლე ამ ურთიერთობაში, შეცდომებზეც ვისწავლე.