დღეს „ჰით ბათუმი 2015“ ფარგლებში ედრიენ ბელიუს კონცერტი გაიმართება - საღამო, რომელიც არ უნდა გამოტოვოთ

”ჰით ბათუმი 2015” გრძელდება. ბათუმი სამყაროს ერთ–ერთ ყველაზე ნოვატორ მუსიკოსს უმასპინძლებს. პროექტის ფარგლებში ცნობილი ამერიკელი გიტარისტი და ვოკალისტი ედრიენ ბელიუ, რომელიც ცნობილია თავისი მონაწილეობით როკ-ჯგუფში „კინგ ქრიმსონი“, დღეს, 26 აგვისტოს, 20:00 საათზე, ბათუმის საზაფხულო თეატრში, კონცერტს გამართავს - ეს იქნება საღამო, რომელიც არ უნდა გამოტოვოთ.

ზღვისპირა ქალაქში ბელიუ თავისი მუსიკალური პროექტის Adrian Belew Power Trio-ს შემადგენლობაში გამოვა

ედრიენ ბელიუს მუსიკა იმ მუსიკოსებისა და ჯგუფების სტილის ერთობლიობაა, სადაც მას უწევდა გამოსვლა: „თოლქინგ ჰედსი“, ფრენკ ზაპა, დევიდ ბოუი და რა თქმა უნდა, „კინგ ქრიმსონი“. ედრიენ ბელიუს გიტარაზე დაკვრის სრულიად არაჩვეულებრივი ტექნიკის გამო, მას ხშირად იწვევენ თავიანთ ალბომებზე სამუშაოდ მსოფლიოს სხვადასხვა ცნობილი მუსიკოსები: ლორი ანდერსონი, პოლ საიმონი, ჟან მიშელ ჟარი და უამრავი სხვ.

დღეს, ის აგრძელებს ცხოვრებასა და შემოქმედებას, გვევლინება რა სხვადასხვა იპოსტასებში, როგორც გიტარისტი, პროდიუსერი, ვოკალისტი, ქმნის კინო მუსიკას ფილმებისთვის. ტალანტი, რომელსაც ძალუძს შექმნას საოცრება, საზღვრები არ აქვს.

ამერიკელი მულტი-ინსტრუმენტალისტი, კომპოზიტორი და მომღერალი ედრიენ ბელიუ (Adrian Belew), მას შემდეგ გახდა ცნობილი, რაც 1981 წელს ცნობილი გიტარისტის და მუსიკოსის, პროდიუსერის რობერტ ფრიპის მიწვევით ლეგენდარულ ჯგუფის „კინგ ქრიმსონის“ რიგებში მოხვდა. ჯგუფს ფრონტმენად მოევლინა, სადაც ის 2008 წლამდე მოღვაწეობდა. ბელიუ ასევე მუშაობდა ისეთ ლეგენდარულ მუსიკოსებთან, როგორებიც იყვნენ დევიდ ბოუი, Nine Inch Nails, ჟან მისელ ჟარ, ფრენკ ზაპა.

ბელიუ ადრეულ ასაკში დასარტყამ ინსტრუმენტზე უკრავდა, მაგრამ ჯიმი ჰენდრიქსის (Jimi Hendrix), მოსმენის შემდეგ, მან გააცნობიერა, რომ მხოლოდ გიტარას შეუძლია გამოხატოს და გადმოსცეს მისი ყველა გამოუთქმელი გრძნობა.

ყველაფერი კი ასე დაიწყო: 1977 წლამდე ედრიენ ბელიუს, ჯერ კიდევ უცნობი მუსიკოსის შესრულების მანერა ფრენკ ზაპამ (Frank Zappa) ერთ–ერთ კონცერტზე შეაფასა და თავის ჯგუფში მიიწვია. სწორედ, ეს გახდა ედრიენ ბელიუსთვის სავიზიტო ბარათი. ამის შემდეგ ის ხვდება დევიდ ბოუისთან, ხოლო შემდეგ „თოლქინგ ჰედსის“ ჯგუფის წევრი. ამის პარალელურად მან თავისი სოლო კარიერაც დაიწყო და პირველი ალბომი გამოუშვა.

ედრიენ ბელიუ რეგულარულად ხვდება წამყვანი ჟურნალების მიერ საუკეთესო გიტარისტების სიაში, ნომერ პირველ გიტარისტად კინგ ქრიმსონის შემადგენლობიდან, მე–17 ადგილზე – Talking Heads–ის შემადგენლობიდან და 67–ე ადგილზე როგორც სოლო არტისტი.

დღეს ედრიენ ბელიუ ბათუმშია!

გარდა ამისა, ზღვისპირა ქალაქი „ჰით ბათუმი 2015“ -ის ფარგლებში 25-30 აგვისტოს ბიგ ჯონსა და გრუვსონიქსის უმასპინძლებს. ამასთან, ქართველი შემრულებლებიც მიიღებენ მონაწილეობას, მათ შორის დათო გომართელი, კორკოტა, ქუჩის მუსიკოსები, გიო ხუციშვილი და მისი ბიჭები, გუფილენდი.

პროექტი „ჰით ბათუმი“ 11 კვირისგან შედგება და თოთოეული კვირა სხვადასხვა მიმართულების არტს მოიცავს. მრავლფეროვანი პროგრამა გათვლილია ყველა თაობისა და გემოვნების ადამიანისთვის. შესაბამისად, დამსვენებლებს შესაძლებლობა აქვთ, საკუთარი ინტერესებიდან გამომდინარე, დაგეგმონ ბათუმში დასვენებისა და გართობის დღეები.

„ჰით ბათუმის“ ფარგლებში, 2 თვის განმავლობაში დაგეგმილია 200-ზე მეტი ღონისძიება, ამ პერიოდის განმავლობაში ბათუმს 20-მდექვეყნიდან 259 უცხოელი არტისტი სტუმრობს. ღონისძებაში ჩართულია 50 ორგანიზაცია და 2000-მდე მონაწილე.

„ჰით ბათუმი 2015“ წარმოადგენს ბათუმის საზაფხულო სეზონის სპეციალურ პროექტს, რომელიც თავის თავში მოიცავს 2 თვიანი პერიოდის განმავლობაში სხვადასხვა მიმართულების ფესტივალებისა და გასართობი ღონისძიებების ჩატარებას უწყვეტ რეჟიმში. 6 ივლისიდან 15 სექტემბრამდე, ყოველ კვირას, ბათუმში ჩატარდება განსხვავებული ტიპის ივენთები, რომლის კომუნიკაციაც მოხდება ერთიანი ქოლგის ქვეშ, სახელწოდებით „ჰით ბათუმი“.

პროექტის განმახორციელებელია ბათუმის მერია და საკრებულო, ასევე მის განხორციელებაში ჩართულები არიან კულტურისა და ძეგლთა დაცვის სამინისტრო და მისი სსიპი „კულტურის განვითარების საინვესტიციო ფონდი“, ტურიზმის ეროვნული ადმინისტრაცია და აჭარის ტურიზმის დეპარტამენტი. პროექტი „ჰით ბათუმი“ სახელმწიფო პროექტს წარმოადგენს, რომლის მიზანია ერთის მხრივ აჭარის ტურისტული პოტენციალის, ხოლო მეორეს მხრივ მთლიანად ქვეყნის პრომოუშენი გარე და შიდა აუდიტორიაში.