მედიის ცნობით, სამხედრო თავდასხმას 18 პირი ემსხვერპლა

ავღანეთში, ჰელმანდის პროვინციაში რადიკალური მოძრაობა „თალიბანმა“ სამხედროებზე თავდასხმა განახორციელა. ინფორმაციას ამის შესახებ ადგილობრივი მედია ავრცელებს.

როგორც ტელეარხ TOLO News-ს ძალოვან უწყებებში თავისმა წყარომ განუცხადა, ავღანეთის ჯარის საკონტროლო-გამშვებ პუნქტთან დანაღმული ავტომობილი აფეთქდა, რასაც 18 სამხედრო მოსამსახურე ემსხვერპლა.

ამასთან ერთად, პროვინციის გუბერნატორის პრესმდივანმა, ომარ ზვაკმა განაცხადა, რომ აფეთქებას 5 სამხედრო ემსხვერპლა და კიდევ 5 დაიჭრა. აფეთქებაზე პასუხისმგებლობა „თალიბანმა“ უკვე აიღო.

აშშ-სა და „თალიბანს“ შორის შეთანხმება თებერვლის ბოლოს შედგა. დოკუმენტის მიხედვით, შეერთებული შტატები და ნატოს მოკავშირეები შეთანხმდნენ, რომ მათი ყველა სამხედრო ავღანეთს სრულად 14 თვის განმავლობაში დატოვებს. „თალიბანმა“ შეთანხმება დაარღვია და საბრძოლო მოქმედებები განაახლა.