"ასე იქცეოდა ჰიტლერი, როდესაც მიხვდა, რომ წაგებისთვის იყო განწირული" - რას ცდილობს პუტინი და როგორ შეიძლება აისახოს ომის მიმდინარეობაზე უკრაინის ქალაქების დაბომბვა?

8 ოქტომბერს, გამთენიისას, ყირიმის (ქერჩის) ხიდი აფეთქდა, რომელსაც არა მარტო სამხედრო-სტრატეგიული და ინფრასტრუქტურული დანიშნულება აქვს, არამედ რუსეთისთვის ყირიმის ანექსიის სიმბოლოცაა. რუსეთის პრეზიდენტმა ვლადიმერ პუტინმა განაცხადა, რომ აფეთქება ყირიმისა და რუსეთის დამაკავშირებელ მთავარ ხიდზე უკრაინის სპეცსამსახურების მიერ დაგეგმილი ტერორისტული აქტი იყო. ოკუპანტმა რუსეთმა 10 ოქტომბერს, დილიდან უკრაინის დიდ ქალაქებზე სარაკეტო იერიში მიიტანა. მათ შორის დაბომბეს კიევი, სადაც აფეთქებებს მსხვერპლი მოჰყვა. აფეთქებების შესახებ იუწყებიან ლვოვიდან, დნეპროპეტროვსკიდან, ნიკოლაევიდან, ჟიტომირიდან, ხმელნიცკიდან, კრივოი როგიდან, ზაპოროჟიედან და სლავიანსკიდან. უკრაინის მოქალაქეებს თავშესაფრებში დარჩენისკენ მოუწოდებენ. უკრაინაში მიმდინარე პროცესებს სამხედრო-ანალიტიკური ჟურნალ "არსენალის“ მთავარი რედაქტორი ირაკლი ალადაშვილი აფასებს: -ის, რაც 10 ოქტომბრის დილიდან დაიწყო, მოსალოდნელი იყო. პუტინს, როგორც 21-ე საუკუნის ჰიტლერს, სხვა გზა აღარ დარჩენია, გარდა შურისძიებისა - უკრაინას მიაყენოს წერტილოვანი დარტყმები.