რომელი პრობლემები გამოჩნდა მედიასა და ექსპერტებთან ივანიშვილის შეხვედრის შემდეგ?
საგარეო საქმეთა მინისტრის ყოფილი მოადგილე სერგი კაპანაძე სოციალურ ქსელში ივანიშვილისა და მედიის შეხვედრას ეხმაურება. კაპანაძის ფეისბუქ სტატუსს droni.ge უცვლელად გთავაზობთ.
„მძიმე სურათია ნამდვილად.
წინა შეხვედრის შემდეგ ერთი ადამიანი როგორ არ გამოჩნდა, რომ ერჩია პრემიერ-მინისტრისთვის,
რომ ის შეხვედრა მისთვის კარგი არ იყო? ან ამ შეხვედრას რომ გეგმავდა ჟურნალისტებთან, როგორ არავინ ურჩია, რომ ეს არ გაეკეთებინა?
მიუხედავად იმისა, რომ დღევანდელ შეხვედრაზე ჩემმა სახელმა (მართალია დამახინჯებულად - "სერგო", მაგრამ მაინც) ბევრჯერ გაიჟღერა, არანაირი სურვილი არ მაქვს შევყვე, თუ „ჩავყვე“ პრემიერს ამ "ორღობის ჭორაობაში", გნებავთ "სუფრულ ბაზარში". არც იმის სურვილი მაქვს, ვამტკიცო, რომ პოლიტიკური პარტიის წევრი არ ვარ და არც ერთ პარტიას არ თანავუგრძნობ. უფრო ფუნდამენტური პრობლემები გამოჩნდა ექსპერტებთან და ჟურნალისტებთან ბიძინა ივანიშვილის შეხვედრიდან და მინდა ამ პრობლემებს შევეხო.
1. ამ კაცს არ შეუძლია კრიტიკის მოსმენა. ეს კატასტროფაა სახელმწიფო მოხელისთვის.
2. მას არ სჯერა ციფრების - არც საქსტატის და არც რეიტინგული საერთაშორისო გამოცემების. მხოლოდ ისაა მართალი, ხოლო ყველა დანარჩენი ტყუის. ესეც კატასტროფაა. როგორც ჩანს, მას არავისი არ სჯერა. მხოლოდ საკუთარი თავის. არა და მილიარდერია და პრემიერ მინისტრია. როგორ გინდა დაარწმუნო, რომ ყველაფერში მართალი ვერ იქნება?
3. მესამე, ის ხშირად იტყუება და შეგნებულად, თუ შეუგნებლად შეცდომაში შეჰყავს მოსახლეობა. კერძოდ: ამბობს, რომ საქართველოს მდგომარეობა მშპ/ერთ სულ მოსახლეზე მიხედვით ბოლოა პოსტ საბჭოთა სივრცეში; ამ დროს საქართველო უსწრებს მოლდოვას, სომხეთს, უზბეკეთს, ტაჯიკეთს, ყირგიზეთს, ცოტათი ჩამორჩება და, სავარაუდოდ, 6 %-იანი ზრდის შემთხვევაში, წელსვე გაასწრებდა უკრაინას; ამბობს, რომ მთავრობა თითქმის არ ყიდულობს ავტომანქანებს, ამ დროს ყიდულობს და საკმაოდ ბევრსაც ხარჯავს; ამბობს, რომ მთავრობა ჰქმნის ახალ საწარმოებს, ამ დროს გუშინ პარლამენტში გავრცელებული დაფინანსებული 49 საწარმოს სიიდან მხოლოდ 15 შეიქმნა ბოლო ერთ წელიწადში, თანაც ეს საწარმოები კრედიტებით დაფინანსდა; ამბობს, რომ 2009 წელს ყაზახეთში ეუთოს სამიტზე საააკაშვილს ხელიც არ ჩამოართვეს, ამ დროს ეუთოს სამიტი 2010 წელს იყო და სააკაშვილს შეხვედრები ჰქონდა ჰილარი კლინტონთან, ასევე შვეიცარიის, აზერბაიჯანის და ყაზახეთის პრეზიდენტებთან; და ასე შემდეგ... ესეც კატასტროფაა.
4. მას სჯერა, რომ აქვს უფლება დამოძღვროს ჟურნალისტები, ან დამოუკიდებელი ექსპერტები და წყინს, როდესაც ეს იწვევს პროტესტის გრძნობას. ეს „კაჩაობის“ პოლიტიკა სერიოზულ ზიანს აყენებს ქვეყანას. იქნებ ვინმემ ისეთმა აუხსნათ ეს, რომელსაც ხანდახან მაინც გისმენთ ხოლმე.
5. მას არ ჰყავს მრჩეველები. ვინც ჰყავს, როგორც ჩანს, სრულიად არაკომპენტურები არიან.
6. მან არ იცის რა მდგომარეობაა მის მთავრობაში, არ იცის, რომ კოორდინაცია არ არსებობს, არ იცის, რომ რამდენიმე სამინისტრო პარალიზებულია და უბრალოდ დინებას მიჰყვება. არ იცის, რომ მინისტრები გაურბიან გადაწყვეტილებების მიღებას რთულ საკითხებზე. ან იცის, და ცდილობს თვალებში ნაცარი შეგვაყაროს.
7. მას აქვს ღირებულებების პრობლემა. არ ესმის, რომ დიცის და დვანის მოსახლეობის გვერდზე დადგომის შედარება ქვეყანაში არსებულ სხვა პრობლემებთან და „გაჭირვებულებთან“, როგოც მინიმუმ, მორალური არ არის. მას არ სჯერა ევროპული ღირებულებების და ევროკავშირში ინტეგრაციის. მისთვის, როგორც ჩანს, ევროპული ინტეგრაცია და ნატო უფრო პრაგმატული გათვლაა, ვიდრე ღირებულება.
8. რაც უფრო მეტს ლაპარაკობს, მით მეტ ზიანს აყენებს ქვეყანას. დღეს ისევ გაიმეორა, რომ საქართველოს ხელისუფლებას ადანაშაულებს ომის დაწყებაში და არა საქართველოს. ანაბანაა საერთაშორისო სამართლის, რომ ქვეყნის ხელისუფლების ქმედება ქვეყნის ქმედებას ნიშნავს. იქნებ ესეც აუხსნას ვინმემ.
9. ის აპირებს, რომ პრემიერობის დატოვების შემდეგ „გვერდიდან მართოს ქვეყანა“. ეს სრული კატასტროფაა სახელმწიფო ინსტიტუტებისთვის.
10. და ბოლოს. ყველაზე საშიში ისაა, რომ ამ ყველაფერს გულწრფელად ამბობს. გულწრფელობა ნამდვილად მისი ძლიერი მხარეა.
მოკლედ, ცუდადაა ჩვენი საქმე... „ - წერს კაპანაძე საკუთარ ფეისბუქ გვერდზე
მსგავსი სიახლეები
კომენტარი