კახა კუკავა: „ეს ხელისუფლების ტკბილი სიზმრებია“...

კონსერვატიული პარტიის ლიდერი, კახა კუკავა აქციების მესამე ტალღისთვის ემზადება. იგი პარლამენტში შეჭრას და რევოლუციის მოწყობასაც არ გამორიცხავს. „არჩევნების გაყალბების შემთხვევაში ისე მოვიქცევი, როგორც „ნაცმო“ 2003 წლის ნოემბერში მოიქცა. ხელისუფლება უნდა გადაეცეს იმ ძალას, რომელიც არჩევნებში გაიმარჯვებს. თუ ხელისუფლება არ გადასცემს ძალაუფლებას გამარჯვებულს, ბუნებრივია, რომ ხელისუფლების გადაწყვეტილებას არ დავემორჩილებით“, - განაცხადა კუკავამ „დრონი.ჯი“-სთან საუბრისას.

„დრონი.ჯი“: ოპოზიცია გაიყო პრო-რუსულად და პრო-დასავლურად. რატომ გაგიჩნდათ რუსეთისკენ სწრაფვის სურვილი?

კახა კუკავა: ჩვენ არსად სწრაფვის სურვილი არ გაგვჩენია. ეს არის ილუზია და მეტი არაფერი. ჩვენ რუსეთთან მოლაპარაკებების დაწყებას ვაპირებთ, ისე, მოლაპარაკებები ყოველთვის მიმდინარეობდა. ჟენევაში მოლაპარაკებას მთავრობაც აწარმოებს, ამ პროცესში ოპოზიციაც ჩაერთო. არა მგონია, რომ ეს დიდი სიახლე იყოს, უბრალოდ, ყველა არჩევნების წინ გაისმის ხოლმე ხელისუფლების ცნობილი კრუნჩხვები რუსეთის ჯაშუშების შესახებ.

- ზოგიერთი ოპოზიციონერის აზრით, მოღალატეები და პრო-რუსული ძალებიც კი ხართ.

- უკაცრავად, ვერ მეტყვით, რომელი ოპოზიციონერები მიიჩნევენ ასე?

- ბაჩუკი ქარდავამ რუსეთთან მოლაპარაკების დაწყების მსურველებს მოღალატეები უწოდა და „ქრისტიან-დემოკრატებმა“ კი განაცხადეს, რომ ოპოზიცია პრო-რუსულ და პრო-დასავლურ ძალებად ყალიბდება.

- ბაჩუკი ქარდავა და „ქრისტიან-დემოკრატები“ როგორი ოპოზიციონერებიც არიან, ზუსტად ისეთი რუსეთის ჯაშუშები ვართ ჩვენ.

- ნოღაიდელის მსგავსად რუსეთში გამგზავრებას და პუტინთან შეხვედრას თქვენც გეგმავთ?

- ჩვენ ვიზიტი დაგეგმილი არა გვაქვს, თუმცა რამდენჯერმე განვაცხადეთ, რომ რუსეთში გამგზავრებას არ გამოვრიცხავთ. რუსეთ-საქართველოს ურთიერთობების აღდგენა საჭიროა.

- რამდენად ეთიკურია ურთიერთობების აღდგენა და იმ სახელმწიფოში ჩასვლა, რომელსაც ჩვენი ტერიტორიები ოკუპირებული აქვს და უამრავი მოქალაქე დაგვიხოცა?

- მაშინ, გამოდის, რომ საქართველოს არ უნდა ჰქონდეს ურთიერთობა სხვა მეზობლებთანაც, იგივე თურქეთთან, ირანთან, სომხეთთან და ასევე არაბეთის ნახევარკუნძულის ქვეყნებთან, რომლებიც ჩვენი ინვესტორები არიან. სახელმწიფოსთან, რომელთანაც ომი გვქონდა, არ უნდა გვქონდეს ურთიერთობა? ეს არასერიოზული დამოკიდებულებაა. მაშინ საფრანგეთი და გერმანია, იაპონია და აშშ უნდა იყვნენ მუდმივად საომარ მდგომარეობაში.

- კრემლი ოკუპირებული ტერიტორიების დაბრუნებას, როგორც ჩანს, არ გეგმავს და რა პერსპექტივა აქვს დიალოგის დაწყებას?

- პერსპექტივა არის ურთიერთობების მოგვარება და ის, რომ ჩვენ პოზიტივზე ვართ ორიენტირებულები. ძირითადი განსხვავება ხელისუფლებასა და ოპოზიციას შორის ამაშია. ჩვენ ვეძებთ გზებს კონფლიქტის მოსაგვარებლად და ხელისუფლება კი ეძებს გზებს ახალი კონფრონტაციის დასაწყებად.

ტერიტორიების დაბრუნება არის გრძელვადიანი პროცესის ბოლო ნაბიჯი. სულელის გარდა, დღეს არავინ იტყვის, რომ პირველი, რაც რუსეთმა უნდა გააკეთოს, ეს არის ტერიტორიების დაბრუნება. ეს დაახლოებით ისეთივე სისულელე იქნება, ჩვენ რომ წავუყენოთ თურქეთს ულტიმატუმი, ტაო-კლარჯეთს სანამ არ დააბრუნებეთ, დიპლომატიური ურთიერთობა არ გვექნება თქვენთანო.

ეს არის არარეალური. რა თქმა უნდა, ტერიტორიების დაბრუნება ყველა ქართველის ოცნებაა, მაგრამ უნდა გვესმოდეს, რომ რეალურად ეს შეიძლება გახდეს მხოლოდ სერიოზული პოლიტიკური პროცესის, სამართლებრივი პროცესის შედეგი. თუ იქნება ისეთი დამოკიდებულება, რომ რუსეთს მხოლოდ მაშინ დაველაპარაკებით, როცა ტერიტორიებს დაგვიბრუნებსო, ეს იქნება შეცდომა, რადგან, არა მგონია, რუსეთმა ტერიტორიები თავისით დააბრუნოს.

- პაატა დავითაია არ გამორიცხავს რუსეთთან ახალ სამხედრო დაპირისპირებას, ეს რამდენად შესაძლებელია?

- არ ვიცი. იცით, ზუსტად ვერც ჩვენ გეტყვით იმას, რომ რუსეთ-საქართველოს ურთიერთობა მოგვარდება, ყოველ შემთხვევაში, როდის მოგვარდება, ამის თქმა დღეს რთულია, ისევე როგორც რთულია იმის თქმა, ახალი კონფრონტაცია იქნება თუ არა.

- როგორ შეაფასებდით ნოღაიდელის მიერ „ედინაია რასიასთან“ ხელშეკრულების გაფორმებას, მის ნაბიჯს საზოგადოების ნაწილის მხრიდან დიდი აგრესია მოჰყვა.

- ეს არის პარტიული საკითხი. პრინციპული საკითხი, რაზეც დებატები მიმდინარეობს, მდგომარეობს იმაში, რომ ჩვენ, უნდა გვქონდეს თუ არა აქტიური დიპლომატია რუსეთთან და, ჩემი აზრით, უნდა გვქონდეს. ეს არის ჩემთვის პრინციპული. ერთადერთი ფრონტი, სადაც შეგვიძლია რუსეთის დამარცხება, არის დიპლომატიური ფრონტი. ჩვენი არჩევანია, რომ საქართველოს მომავალმა ხელისუფლებამ აქტიური დიპლომატია აწარმოოს რუსეთთან. რა თქმა უნდა, იქნება ცივი და თბილი პერიოდები, მაგრამ ჩვენ, უნდა გვქონდეს პოზიტიური დინამიკა. რაც შეეხება იმ დეტალებს, ლავროვს ჩამოართმევ ხელს თუ „ედინაია რასიასთან“ გააფორმებ მემორანდუმს, ეს პრინციპული საკითხი არ არის, ეს ტაქტიკური საკითხია.

- ამბობენ, ნოღაიდელი ხელისუფლების თამაშს თამაშობსო, თქვენ რატომ დაუმეგობრდით ნოღაიდელს, ადრე მის მიმართ საკმაოდ აგრესიულად იყავით განწყობილი, რა შეიცვალა?

- საქართველოში ვერსიები არ ილევა, შეიძლება ნებისმიერი ვერსია გამოითქვას, მაგ: 46 ტრილიონი აქვს აღებული ოპოზიციასო. რაც შეეხება ნოღაიდელს, ჩვენი პოზიცია მისი ფიგურის მიმართ ისეთივეა, როგორიც იყო ბოლო წლების განმავლობაში. მიუხედავად იმისა, რომ ოპოზიციაში არის სხვაობა, მიგვაჩნია, რომ უნდა მოვნახოთ ის ერთი საერთო შეხების წერტილი, რომელიც აუცილებელია ხელისუფლების შესაცვლელად.

ჩემთვის გაუგებარია - ნოღაიდელი, რომელიც იძახის, რომ არ დააყენებს თავის კანდიდატურას და მზად არის დაუჭიროს მხარი ოპოზიციის ერთიან კანდიდატს, რატომ არ უნდა მიგვეღო? ძალიან არარაციონალური უნდა იყოს ადამიანი, რომ თქვას, არა, არ დამიჭირო მხარიო.

- „ალიანსი საქართველოსთვის“ პოზიციას - ყველა მინუს ერთი, როგორ აფასებთ, ამას აცხადებენ და იმავდროულად ამბობენ, რომ არჩევნებში გასამარჯვებლად საჭიროა ოპოზიციის გაერთიანება და თქვენ როგორ წარმოგიდგენიათ ოპოზიციის გაერთიანება?

- ეს არის „ალიანსში“ მიმდინარე შიდა პროცესი, ეს პროცესი ალბათ რამდენიმე დღეში დასრულდება. ჩვენ ზემოქმედების რაიმე ბერკეტი არ გაგვაჩნია. ჩვენ დაინტერესებული ვართ, რომ ერთობაში იყოს „ალიანსი“ მთლიანად. რა გადაწყვეტილებას მიიღებს „ალიანსი“, არ ვიცით.რაც შეეხება ოპოზიციის გაერთიანებას, თქვენი აზრით, როგორ უნდა წარმომედგინოს? რა თქმა უნდა, პრაიმერის გზით.

- „ალიანსი“ პრაიმერში მონაწილეობის მიღებას ნოღაიდელის გამო არ აპირებს და როგორღა გაერთიანდებით?…

- ვნახოთ, რა იქნება, იმიტომ გითხარით, რომ ეს არის პროცესი. დაველოდოთ შედეგებს.

- ისე, პრაიმერზე ამბობენ, მკვდრადშობილიაო.

- ასე ამბობდნენ, მაგრამ, მე მგონი, ფაქტია, რომ პრაიმერის მიმართ ინტერესი კი არ მცირდება, არამედ იზრდება.

- გოგა ხაინდრავამ განაცხადა, რომ კუკავას და ძიძიგურის სამშობლოსადმი ერთგულებაში ეჭვი არასდროს მეპარებოდა, მაგრამ გაუგებარია ნოღაიდელთან მათი ალიანსიო...

- მესმის, ეს კითხვა ბევრ ადამიანს აწუხებს, განსაკუთრებით მათ, ვინც პოლიტიკაში არ არის. ჩვენ განვმარტეთ და კვლავ გეტყვით, რომ ჩვენ და ნოღაიდელს რომ გვაქვს, იმაზე დიდი სხვაობებიც არსებობს. 2008, 2009 წლებში ერთად ვიდექით ისეთი ადამიანები, რომლებიც სამოქალაქო ომის დროს ბარიკადის სხვა მხარეზე იდგნენ, მაგრამ ეს დაპირისპირება გადაილახა, რადგან არსებობს რაღაც უფრო მნიშვნელოვანი.

- „ლეიბორისტები“, თქვენგან განსხვავებით, ხელისუფლებაზე გამარჯვების გზად დაუმორჩილებლობას მიიჩნევენ, რამდენად მართებულია მათი პოზიცია?

- „ლეიბორისტებს“ აქვთ თავიანთი ხედვა. ჩვენ მათთან გვაქვს კოორდინაცია. არჩევნებთან დაკავშირებით გვაქვს განსხვავებული პოზიცია, მაგრამ, რაც შეეხება არჩევნების შემდეგ ხმების დაცვას, არ გამოვრიცხავ, რომ ამაში გვქონდეს საერთო ხედვა.

- არჩევნების გაყალბების შემთხვევაში ისე მოვიქცევი, როგორც „ნაცმო“ 2003 წლის ნოემბერში მოიქცაო - ამბობთ, რას ნიშნავს თქვენი განცხადება, რევოლუციის მოწყობას აპირებთ?

- დიახ, ასე მოვიქცევით. ვაპირებთ ჩვენი უფლებების დაცვას. თუ ხელისუფლება გააყალბებს არჩევნებს, მე მგონი, ასე მოქცევის უფლება გვაქვს. რაც შეეხება იმას, თუ კონკრეტულად როგორ განვითარდება მოვლენები, ამის პროგნოზი რთულია. ხელისუფლება უნდა გადაეცეს იმ ძალას, რომელიც არჩევნებში გაიმარჯვებს. თუ ისინი უარს იტყვიან ძალაუფლება გადასცენ გამარჯვებულს, ბუნებრივია, რომ ჩვენ ხელისუფლების გადაწყვეტილებას არ დავემორჩილებით.

- რამდენად იქნება აქციების მესამე ტალღა შედეგიანი, ოპოზიციას საზოგადოება 9 აპრილის აქციების შემდეგ აღარ სწყალობს...

- საპროტესტო აქციების დროს საზოგადოება არასდროს პასიურობდა და დარწმუნებული ვარ, ახლაც ასე იქნება. რაც შეეხება იმ აზრს, რომ საზოგადოება ოპოზიციას აღარ სწყალობს, ეს ხელისუფლების ტკბილი სიზმრებია. მათ ჰგონიათ ხოლმე, რომ აი, ახლა, მაინც აღარ გამოვა ხალხი აქციებზეო.

ყოველკვირეული გაზეთი „დრონი.ჯი“ (გამოდის ორშაბათობით)