– არჩევნების შემდეგ ერთმნიშვნელოვნად დადგა საკითხი, თუ როგორ გავაგრძელებდით „ალიანსში“ შემავალი პოლიტიკური პარტიები ურთიერთობას. ასევე დადგა საკითხი, რომ გაგვეანალიზებინა არჩევნების შედეგები. ერთია, რომ „ალიანსმა“ აჩვენა ოპოზიციაში ყველაზე რეიტინგული ძალა რომ არის, მაგრამ მეორე მხრივ, ის 19%-ი, რომელიც მიიღო „ალიანსმა“, ცხადია, არ იყო საკმარისი იმისთვის, რომ ამ შედეგებისთვის გამარჯვება დაგვერქვა. ამიტომ, ბუნებრივია, დავიწყეთ ანალიზი და ანალიზის პროცესში „ახლების“ მხრიდან გამოითქვა მოსაზრება, რომ ხომ არ ჯობია გავაძლიეროთ ჩვენ პროდასავლური კურსი ქართულ პოლიტიკაში და ევროპული სახელმწიფოების მსხვილი პოლიტიკური გაერთიანებების მსგავსად, რომლებიც ერთ მსოფმხედველობაზე არიან ორიენტირებულნი, შევქმნათ დიდი პოლიტიკური გაერთიანება, ანუ გავაჩეროთ ჩვენი პარტიების საქმიანობა და ერთ პოლიტიკურ ძალად ჩამოვყალიბდეთ. როგორც ჩანს, ამ ეტაპზე ჩვენს ქვეყანაში არსებულ პოლიტიკურ ძალებს არ გვყოფნის პოლიტიკური კულტურა, რომ წავიდეთ გამსხვილებისკენ. ამიტომ ვფიქრობთ, რომ ეს ცოტა უახლოესი მომავლის საქმე შეიძლება გახდეს და ამ ეტაპზე გადავწყვიტეთ, რომ ერთმანეთს თავისუფალი მოქმედების საშუალება მივცეთ, ყველამ ვიზრუნოთ ჩვენი პოლიტიკური პარტიების გაძლიერებაზე, თუმცა კიდევ ერთხელ ვამბობთ, რომ ყველანაირად ვეცდებით, რათა ჩვენი ურთიერთობა იყოს მჭიდრო კოორდინაციულ რეჟიმში და შემდეგ ვნახავთ, სად მოხდება ჩვენი გზების გადაკვეთა.