მარიუპოლში კიდევ ერთი მასობრივი საფლავი აღმოაჩინეს, რომელშიც ასზე მეტი ცხედარია

მარიუპოლის მერის მრჩეველი, პეტრო ანდრიუშჩენკო აცხადებს, რომ ქალაქში კიდევ ერთი მასობრივი საფლავი აღმოაჩინეს, რომელშიც ასზე მეტი ცხედარია.

მისი ინფორმაციით, მასობრივი საფლავი კიევის ქუჩაზე ნახეს.

"თებერვლის ბოლოდან იქ 100-ზე მეტი ადამიანის ცხედარია", - წერს ის.

მერის მრჩეველი ამბობს, რომ მარიუპოლში ექსჰუმაცია ფაქტობრივად შეჩერებულია.

"საოკუპაციო ხელისუფლება იმდენად გაიტაცა აღდგენის სურათის შექმნამ, რომ ხელახალ დასაფლავებამდე ვერ მიაღწიეს. ქუჩის დროებითი საფლავები თანდათან მუდმივ საფლავებად იქცევა", - თქვა მან.

ცნობისთვის, მარიუპოლი ამ დრომდე ოკუპანტების კონტროლის ქვეშაა. ქალაქის ქუჩებში ტონობით ნაგავია დაგროვილი. მერი ამბობს, რომ ქალაქი ეპიდემიოლოგიური კატასტროფის ზღვარზეა, გავრცელებულია ინფექციური დაავადებები - მათ შორის ქოლერა და დიზენტერია.