"ბავშვი ცოცხალი და ჯანმრთელი იქნებოდა, დაოჯახდებოდა, ეყოლებოდა შვილები და ბედნიერად იცხოვრებდა. რა საშინელებაა" -საქართველოს გზებზე არსებული სიტუაცია ჯოჯოხეთში მიმავალ გზას ჰგავს

ლეონიდ ჩერნოვეცკი სოციალურ ქსელში საქართველოს გზებზე არსებული სიტუაციების შესახებ წერს: საქართველოს გზებზე არსებული სიტუაცია ჯოჯოხეთში მიმავალ გზას გავს. 21 მარტს მეტად სამწუხარო ფაქტი მოხდა, დაიღუპა დედასთან ერთად გაჩერებაზე მდგომი გოგონა, დედა-შვილი სკოლაში მიდიოდა და ავტობუსს ელოდებოდნენ. ამ დროს დიდი სიჩქარით მოძრავი „BMW”-ს მარკის ავტომობილი ორივეს დაეჯახა, გოგონა დაიღუპა. ამ ბავშვს, რომ სხვა ქვეყანაში ეცხოვრა, იქ, სადაც კანონი უზენაესია და მას ყველა იცავს, ცოცხალი და ჯანმრთელი იქნებოდა, დაოჯახდებოდა, ეყოლებოდა შვილები და ბედნიერად იცხოვრებდა. რა საშინელებაა!
სამწუხაროდ, ასეთი შემთხვევები საქართველოში ყოველკვირეულად ხდება და ამაზე პასუხისმგებელია ყველა პარლამენტარი, რომლებიც სხდომებს ატარებენ, მაგრამ რატომღაც წელავენ გზებზე უსაფრთხოების შესახებ კანონის მიღებას. ისინი ტაძრებში დადიან და ათეულობით ვიდეოკამერის თანდასწრებით პირჯვარს იწერენ, სტუმრობენ ბავშვთა სახლებს, სხვადასხვა დღესასწაულებს, ზამთარში პატარებისთვის 50-თეთრიანი ნაყინი მიაქვთ, რითაც ცდილობენ ყველას თავი მოაწონონ, ამ დროს კი, მხრებზე ათობით ათასი ქართველის ცოდვა აწევთ, რომლებიც საქართველოს გზებზე ან დაიღუპნენ, ან ინვალიდებად იქცნენ, ქვეყანაში, სადაც ეს შიმშილით სიკვდილის ტოლფასია. და ყოველივე მკაცრი საკანონმდებლო ბაზის არარსებობის გამო მოხდა.
ნუთუ, პარალმენტში დაკავებული სრულიად უსარგებლო ადგილები მათთვის ადამიანების სიცოცხლეზე მეტად ძვირფასია? ისინი უკვე 4 წელია თბილისიდან ქუთაისში სხდომებზე დასეირნობენ, არაფერს აკეთებენ და მაინც პარლამენტის წევრები ჰქვიათ. ბიბლია ერთხელ მაინც რომ გადაიკითხონ, ნახავენ, რომ ცოდვა არა მხოლოდ რაიმე ბოროტების ჩადენაა, არამედ ისიც, თუ უმოქმედობით მას ხელს უწყობ, ბოროტებაა, როდესაც შეგიძლია ადამიანებს დიდხანს სიცოცხლის საშუალება მისცე და ამას არ აკეთებ.
2016 წელს, საქართველოში მომხდარ ავტოავარიებში 581 ადამიანი დაიღუპა, სხეულის დაზიანება 9951-მა ადამიანმა მიიღო.
ამავე წელს, ავტომობილის ალკოჰოლური ზემოქმედების ქვეშ მართვისთვის 30 ათასი მძღოლი დააჯარიმეს (მათ მართვის მოწმობა 6 თვით ჩამოერთვათ)
ეს უზარმაზარი ციფრია - გამოდის, რომ საქართველოში 30 ათასამდე მკვლელი მოძრაობდა და მადლობა ღმერთს, რომ არავინ დაშავებულა. თუმცა, სინამდვილეში, თუ ფარულ კანონდარღვევებსაც ჩავთლით, გამოვა, რომ გზებზე ასობით ათასი მკვლელი დადის და ეს უზარმაზარი კატასტროფაა ქვეყნისთვის, სადაც 3 მლნ ადამიანი ცხოვრობს.

ამ საკითხში იკვეთება 2 მთავარი პრობლემა:
1) აუცილებელია დროულად იქნეს მიღებული უმკაცრესი კანონი - ეს უნდა მოხდეს დაუყოვნებლივ და არა მომავალ წელს, როგორც იანვარში თქვეს. 1 წლის განმავლობაში კი, ბავშვებისა და უმწეო მოხუცების, მინიმუმ, 10 000 სიკვდილი გველის!
2) უნდა ხდებოდეს კანონის აღსრულება - პატრული ძალიან მკაცრი უნდა იყოს და წესების დამრღვევ მძღოლს არანაირი შეღავათი არ უნდა გაეწიოს.

მიმაჩნია, რომ ნასვამ მძღოლებს მართვის მოწმობა მინიმუმ 3 წლით უნდა ჩამოერთვათ და თუ მსგავსს მეორედაც გაიმეორებენ, რამდენიმეწლიანი პატიმრობაც უნდა მიესაჯოთ, რადგან ასეთი დამრღვევი პოტენციური მკვლელია და ეს საქართველოში ყველამ უნდა იცოდეს!