მონადირეებმა ორენბურგთან ჩუპაკაბრა მოკლეს (ვიდეო)
ორენბურგის ოლქის ბელიაევსკის რაიონში მონადირეები იძულებულნი გახდნენ მოეკლათ აგრესიული ცხოველი, რომელიც მოულოდნელად გამოხტა ტყიდან, ორ თათზე დადგა და მონადირეებს დაესხა თავს. მოგვიანებით გამოცხადდა, რომ მოკლული ცხოველი ჩუპაკაბრაა.
შეგახსენებთ, რომ რუსეთის რამდენიმე რაიონში მითიური ცხოველის გამოჩენის სესახებ ინფორმაცია პერიოდულად ვრცელდებოდა. ორენბურგის, ნიჟნი ნოვგოროდისა და კალინინგრადის რაიონებთან ერთად ჩუპაკაბრას ადგილსამყოფელად მოსკოვის ოლქიც სახელდებოდა. ამასთან დაკავშირებით სტატია „დრონი.ჯი“-მაც გამოაქვეყნა - „მოსკოვთან ახლოს ჩუპაკაბრა გამოჩნდა?“.
იმაზე, რომ რუსეთის რამდენიმე ქალაქში ჩუპაკაბრა ბინადრობდა, ცნობები ჯერ კიდევ 2005 წელს გაჩნდა. ექვსი წლის მანძილზე პერიოდულად ვრცელდებოდა ინფორმაცია უცნაურ ვითარებაში მოკლული შინაური ცხოველებისა და ფრინველების შესახებ. ფრაგმენტი „დრონი.ჯი“-ს სტატიიდან „მოსკოვთან ახლოს ჩუპაკაბრა გამოჩნდა?“:
„ფერმერი, ვასილი ველიკოდნევი დარაჯმა დილის 6 საათზე გააღვიძა და აცნობა, რომ მისი ცხვრები მოკვდნენ. ფერმერი მაშინვე შემტხვევის ადგილზე გავარდა და ნახა, რომ ჯერ კიდევ ცოცხალი, ყელგამოჭმული და სისხლგამოწოვილი ოცდაათამდე ცხვარი ფარეხში უძრავად ეყარა.
„როცა მივედი, ორი უკვე მკვდარი იყო, სამი კი ჩემს თვალწინ მოკვდა“, - იხსენებს ფერმერი. ის იძულებული გახდა, პოლიცია და ვეტერინარი ერთად გამოეძახებინა. სანამ მათ ელოდებოდა, დაფლეთილი ცხვრები ახლოდან დაათვალიერა: მათ ყელი გამოჭმული ჰქონდათ, რბილი ხორცი უკანა ფეხებთან კი - დაფლეთილი. ყელზე მხოლოდ ორი მრგვალი, ლურჯი ჭრილობა ემჩნეოდათ.
საოცარი ის იყო, რომ არც მწვანე მოლზე, არც იმ ადგილას, სადაც ცხვრები ეყარნენ, სისხლის ერთი წვეთი არ ჩანდა. დარაჯებს არათუ ხმაური, ფაჩუნიც არ გაუგიათ და იმ ღამეს არც დიდ, ავ ქოფაკს - ნაიდას დაუყეფია. არანაირი დაზიანებები. არც ურდულებია მოშლილი. არადა, ღობის სიმაღლე მეტრნახევარს აღწევს. როგორც ჩანს, ამოუცნობი მხეცი ამ ღობეს დიდი ჯაფის გარეშე გადაევლო.“
მონადირეების მიერ ორენბურგთან გადაღებულ ვიდეოში კარგად ჩანს ცხოველის უცნაური აგებულება. სწავლულებმა ვიდეო გაშიფრეს, მაგრამ მხოლოდ მხრები აიჩეჩეს - ცხოველი ვერცერთ მათთვის ცნობილ სახეობას ვერ შეადარეს. "არგუმენტი ი ფაქტის" მიერ გავრცელებულ ვიდეოში მართლაც საოცარი ცხოველია გადაღებული, რომელსაც ადამიანის მსგავსი თითები აქვს...
შეგახსენებთ, რომ ჩუპაკაბრა მითიური ცხოველია, რომელიც, გადმოცემის მიხედვით, ძირითადად, ჩრდილოეთ და სამხრეთ ამერიკის კონტინენტებზე ბინადრობს.
ეს ცხოველი შემჩნეული ჰყავთ პუერტო-რიკოში, მექსიკაში, შეერთებულ შტატებში, ყველაზე ხშირად კი ლათინური ამერიკის გლეხების აღწერილობით, ჩუპაკაბრა ეს არის საშუალო ზომის ცხოველი, რომელსაც მთელ ზურგზე ხერხემლის ძვლები აქვს ამოზნექილი. ბიოლოგები ჯერჯერობით თვლიან, რომ ჩუპაკაბრა მხოლოდ მითია.
უფრო ხშირად, ჩუპაკაბრას აღწერენ, როგორც ქვეწარმავლის მსგავს არსებას, რომელსაც მომწვანო-მონაცრისფრო კანი აქვს. სიმაღლეში 1-1,2 მეტრია. მისი სიარულისა და ხტუნვის მანერა მიაგავს კენგურუსას. ერთ-ერთი გადმოცემით, მას შეუძლია 6 მეტრზე ახტეს. სახე და ცხვირი ძაღლს მიუგავს, ენა ხვლიკივით გაყოფილი აქვს, გახსნილი პირიდან კი დიდი ეშვები უჩანს. როცა საფრთხეს გრძნობს, ყივილს იწყებს ან შიშინის მაგვარ ხმას გამოსცემს, მისი თვალები კი წითლდება. ვინც მის სიახლოვესაა, ამ დროს გულისრევის შეგრძნება ეწყება. მას არ აქვს ყურები და ბალანი.“
მსგავსი სიახლეები
კომენტარი