ორთვიანი კომის შემდეგ, 23 წლის სალომე გვასალია გარდაიცვალა
ქუთაისის ინტერვენციული მედიცინის ცენტრში ორთვიანი კომატოზური მდგომარეობის შემდეგ 23 წლის სალომე გვასალია გარდაიცვალა.
სალომე გვასალიას ახლობლები კლინიკასთან შეიკრიბნენ, ისინი დაუდევრობაზე საუბრობენ და ექიმის პასუხისმგებლობის საკითხის დაყენებას მოითხოვენ. მათი თქმით, ოპერაცია არასწორად გაკეთდა.
გარდაცვლილი გოგონას ოჯახი მომხდარში ექიმს ადანაშაულებს და მისი უფლებამოსილების შეჩერებას მოითხოვს. ამასთან, ოჯახის წევრები საქმეში დამოუკიდებელი ექსპერტის ჩართვას მოითხოვენ და დახმარებისთვის პრემიერ - მინისტრს მიმართავენ.
ინტერვენციული მედიცინის ცენტრის იურისტის თქმით, მომხდარზე დაწყებულია გამოძიება. საქმეში ჩართულია ჯანდაცვის სამინისტროს რეგულირების სააგენტო და ამის მიხედვით დადგინდება, ადგილი ჰქონდა თუ არა დაუდევრობას.
23 წლის სალომე გვასალია ორი თვის წინ, სენაკში, ბებიასთან სტუმრობის დროს ხიდან ჩამოვარდა. ის მრავლობითი მოტეხილობებით სენაკის კლინიკიდან ქუთაისის ინტერვენციულ საავადმყოფოში გადაიყვანეს. ოჯახის წევრების ინფორმაციით ახალგაზრდა კონტაქტური იყო და ექიმებმა ოპერაციის სასწრაფოდ ჩატარება საჭიროდ არ ჩათვალეს. მას შემდეგ რაც სალომეს ოპერაცია ჩაუტარდა მისი ჯანმრთელობის მდგომარეობა დამძიმდა და ის ამ დრომდე კომატოზურ მდგომარეობაში იმყოფებოდა.
მსგავსი სიახლეები
კომენტარი