ლევან დოთიაშვილი: ყველაფერი დავინახე, მანქანაში ვიჯექი, მე პირადად

"ყველაფერი დავინახე, მანქანაში ვიჯექი, მე პირადად", - ამის შესახებ ლევან დოთიაშვილმა ფორმულასთან სატელეფონო კომენტარში განაცხადა.

ამ ეტაპზე, დოთიაშვილი მეტ კომენტარს არ აკეთებს. მისი თქმით, მედიას ინფორმაციას მოგვიანებით მიაწვდის. ის გვიან ღამემდე საგამოძიებო უწყებაში გამოკითხვაზე იმყოფებოდა.

"ყველა მაგ მოლოდინში ხართ, ჩემს პასუხს ელოდებით, რა მოხდა და რა არა. ცოტა ხანი, 1-2 საათი მაცადეთ, წამოვდგები ფეხზე და მოგცემთ [ინფორმაციას]", - აღნიშნა დოთიაშვილმა ფორმულასთან.

ოჯახის წევრების განცხადებით, დოთიაშვილს უჭირს მეტყველება და 6 ნოემბერს მომხდარის გახსენება.

ოკუპანტების მიერ გატაცებული ლევან დოთიაშვილი გუშინ გაათავისუფლეს და ცენტრალური ხელისუფლების მიერ კონტროლირებად ტერიტორიაზე გადმოიყვანეს. როგორც სუს-ის ანალიტიკური დეპარტამენტის უფროსის მოადგილემ, ირაკლი ანთიძემ გუშინ განაცხადა, ლევან დოთიაშვილმა თქვა, რომ საოკუპაციო რეჟიმის წარმომადგენლებმა მას დაკავების დროს სახის არეში დაზიანებები მიაყენეს და ოკუპირებულ ცხინვალში მის მიმართ არასათანადო მოპყრობას ადგილი არ ჰქონია.