“წლის წიგნის” პრეზენტაცია
დღეს, 10 აპრილს, განათლების, მეცნიერების, კულტურისა და სპორტის სამინისტროს დარბაზში კალათბურთის ეროვნული ფედერაციის შემაჯამებელი ჟურნალის, “წლის წიგნის” პრეზენტაცია გაიმართა. ფედერაცია “წლის წიგნს” უკვე მეშვიდე წელია გამოსცემს და მასში თავმოყრილია გასული სეზონის მანძილზე ფედერაციის მიერ ორგანიზებული ჩემპიონატები და ღონისძიებები, აგრეთვე ყველა ის აქტივობა, რომელიც ფედერაციამ განახორციელა და მონაწილეობა მიიღო. გარდა ამისა, პირველად, “წლის წიგნის” მთლიანი მასალა ითარგმნა ინგლისურ ენაზე.
იმის გამო, რომ კალათბურთის ფედერაციამ ოფიციალური განაცხადი დააფიქსირა ფიბაში 2021 წლის ევროპის ჩემპიონატის მასპინძლობის შესახებ და ბოლო პერიოდში ფედერაციის ძირითადი ყურადღება გადატანილი იყო ამ პროცესზე, “წლის წიგნის” პრეზენტაცია შედარებით გვიან გაიმართა. აგრეთვე, მიმდინარე წლის სექტემბერში საქართველო მასპინძლობს 3X3 კალათბურთში 18-წლამდელთა ევროპის ჩემპიონატს, რისთვისაც კალათბურთის ფედერაცია უკვე აქტიურად მუშაობს. მრავალი ღონისძიებისა და ჩემპიონატის გარდა, მნიშვნელოვანია წიგნის გარეკანი – რომელზეც გამოსახულია საქართველოს ეროვნული ნაკრების თილისმა, ყველასთვის კარგად ნაცნობი ლომი „ჯეო“ და მისი საკალათბურთო ოჯახი, რომელიც კალათბურთის გულშემატკივარმა პირველად სპორტის სასახლეში, ჩვენი ეროვნული ნაკრების ესტონეთთან დაპირისპირების დროს იხილა.
მომავალი სეზონიდან „ჯეოს“ ოჯახის წევრები მხარს დაუჭერენ და უგულშემატკივრებენ ფედერაციის მიერ ორგანიზებულ სხვადასხვა ჩემპიონატებს. აღნიშნული სიახლე ფიბამაც მოიწონა, რადგან მხარდაჭერაში თილისმების მთლიანი ოჯახის ჩართვა არის უპრეცედენტო შემთხვევა, რომლის ანალოგი მსოფლიოში არ არსებობს.
სპორტული სამყაროს მრავალ წარმომადგენელთან ერთად, ღონისძიებას დაესწრო განათლების, მეცნიერების, კულტურისა და სპორტის მინისტრის პირველი მოადგილე – ბატონი მიხეილ გიორგაძე, რომელმაც იმედი გამოთქვა 2021 წელს ევროპის ჩემპიონატის მასპინძლობასთან დაკავშირებით და კალათბურთის ფედერაციას ინფრასტრუქტურული მხარდაჭერა აღუთქვა.
დამსწრე საზოგადოებას შორის იყვნენ ასევე ვეტერანი კალათბურთელი ქალბატონები, საქართველოს საკალათბურთო ეროვნული ნაკრების წევრები, რომლებსაც ფედერაციის პრეზიდენტმა – ბატონმა პაატა გურასპაულმა სიმბოლური საჩუქრები გადასცა.
საქართველოს კალათბურთის ეროვნულ ფედერაციას სურს კიდევ ერთხელ დიდი მადლობა გადაუხადოს ჟურნალის დიზაინერს – მარიამ რუსიშვილს გაწეული შრომისთვის, პარტნიორებს, სპონსორ კომპანიებს და მედიას მხარდაჭერისთვის და გვერდში დგომისთვის. ასევე „წლის წიგნის“ გამოცემაში შეტანილი წვლილისთვის და გაწეული სპონსორობისთვის დიდი მადლობა განათლების, მეცნიერების, კულტურისა და სპორტის სამინისტროს, კომპანია პსპ-ს, კომპანია „ცოდნისას“ და ფედერაციის ახლადშეძენილ პარტნიორ აჭარასპორტს.
მსგავსი სიახლეები
კომენტარი