"ეს დაავადება არც აღმოიფხვრება და არც გაქრება... გლობალურად მოგვიწევს დაავადებასთან ერთად მუშაობა... " - გაერთიანებულ სამეფოში კორონავირუსის გამო დაწესებული სოციალური შეზღუდვების წლის ბოლომდე შენარჩუნდება?

გაერთიანებული სამეფო ახალი კორონავირუსის გამო დაწესებული სოციალური შეზღუდვების წლის ბოლომდე შენარჩუნებას გეგმავს.

„გაერთიანებულ სამეფოს მინიმუმ წლის ბოლომდე მოუწევს ზოგიერთი შემზღუდავი სოციალური ზომის ატანა“ - განაცხადა მთავრობის მთავარმა მრჩეველმა სამედიცინო საკითხებში. პროფესორ კრის უიტის განცხადებით, აბსოლუტურად არარეალისტურია იმის მოლოდინი, რომ უცებ ცხოვრების ჩვეულ სტილს დავუბრუნდებით, თანაც მალე. მან ასევე განაცხადა, რომ გრძელვადიან პერიოდში იდეალური გამოსავალი მეტად ეფექტური ვაქცინით ან პრეპარატით ამ დაავადების მკურნალობა იქნებოდა. თუმცა, მან მოსახლეობა გააფრთხილა, რომ მომდევნო კალენდარულ წელს ვაქცინის ან პრეპარატის გამოჩენის შანსები ძალზედ მცირე იყო.

„ეს დაავადება არც აღმოიფხვრება და არც გაქრება. ამდენად, ფაქტად უნდა მივიღოთ ის გარემოება, რომ გლობალურად მოგვიწევს დაავადებასთან ერთად მუშაობა პროგნოზირებად მომავალში“ - განაცხადა მან კორონავირუსის საკითხებზე გამართულ ყოველდღიურ სამთავრობო ბრიფინგზე.

უახლესი მონაცემებით დასტურდება, რომ დამატებით 759 ადამიანი შეიწირა ვირუსმა დიდი ბრიტანეთის საავადმყოფოებში, რითაც გარდაცვლილთა ჯამური რაოდენობა 18 100 ადამიანამდე გაზარდა. პროფესორი უიტი ამბობს, რომ საზოგადოება პიკის შემდეგ არ უნდა ელოდეს კორონავირურთან დაკავშირებული გარდაცვლილთა რაოდენობის უცაბედ კლებას და გაქრობას.

„გრაძელვადიან პერიოდში ამ სიტუაციიდან გამოსავალი იდეალურ შემთხვევაში ორიდან ერთი იქნება. ვაქცინა, რომლის პრაქტიკული გამოყენების ბევრი გზა არსებობს. ან ძალზედ ეფექტური პრეპარატია გამოსავალი, რათა ხალხი აღარ კვდებოდეს ამ დაავადების გამო მაშინაც კი, როდესაც ვირუსი შეეყრებათ ან მოწყვლად მოსახლეობაში მოხდეს ამ დაავადების პრევენცია“ - აცხადებს პროფესორი.

პროფესორი უიტი აფრთხილებს მოსახლეობას, რომ მრავალი განსხვავებული გზა არსებობს იმისათვის, რომ კორონავირუსის ეპიდემიის შედეგად ადამიანების გარდაცვალება ან ჯანმრთელობის გაუარესება მოხდეს.

„იმ ადამიანებს ვითვლით, ვინც ახალი კორონავირუსის გამო დაიღუპა, თუმცა სხვები ირიბად კვდებიან, რადგან ჯანდაცვის ეროვნულ სისტემას მოუწია ამ ეპიდემიაზე გადართვა და ამის გამო არჩევით პროცედურებსა და სკრინინგს ნაკლებად მიმართავთ“ - აცხადებს პროფესორი.

მან ასევე თქვა, რომ დანერგილი ინტერვენციები ადამიანებს შორის ურთიერთობის აღკვეთის არეალს აფართოებს, რაც გრძელვადიან პერიოდში ზრდის რისკებს მათი ჯანმრთელობის მიმართ.

„ამდენად, ძალიან სერიოზულად უნდა დავფიქრდეთ ამაზე. როგორ შეიძლება საუკეთესოდ დაბალანსდეს ზომები, რათა საუკეთესო შედეგი მივიღოთ საზოგადოებრივი ჯანდაცვის სფეროში“, - აცხადებს პროფესორი.

მისი აზრით, მინისტრებს მოუწევთ შეზღუდვების სანაცვლოდ სწორი შეთავაზებების გაკეთება. პროფესორი უიტის აზრით, ვაქცინა და პრეპარატი, ნაკლებად სავარაუდოა მომდევნო წლამდე გამოჩნდეს და მანამდე სოციალური დისტანცირების გარკვეული ფორმაა საჭირო. თუმცა, ეს ნამდვილად არ გულისხმობს იმას, რომ ვაქცინის ან პრეპარატის გამოგონებამდე ყველა არსებული შეზღუდვა შენარჩუნდეს. სკოლები, ზოგიერთი სამეწარმეო-ეკონომიკური სუბიექტი და საზოგადოებრივი ტრანსპორტი შეიძლება გაიხსნას არც ისე შორეულ მომავალში. ლუდხანები და რესტორნები ამ სცენარით ალბათ გასახსნელი ობიექტების ჩამონათვალის ბოლოს მოექცევა.

ბრიფინგზე ასევე ისაუბრა გაერთიანებული სამეფოს საგარეო საქმეთა მდივანმა, დომინიკ რააბმა.

„სოციალური დისტანცირების ზომების დროზე ადრე შემსუბუქება კორონავირუსით ინფიცირების შემთხვევათა მეორე პიკის საფრთხეს ქმნის. თუ ასე მოხდა მეორეჯერ მოგვიწევს დახურვა, რაც მთელ ქვეყანაში ეკონომიკურ ტკივილს გაახანგრძლივებს“ - განაცხადა მან.

სერ ნიკ კარტერი, სამხედრო გენერალი და გენ. შტაბის უფროსი ასევე შეუერთდა მთავრობის წარმომადგენლებს ოთხშაბათის პრეს-კონფერენციაზე და კორონავირუსის მიმართ სამხედრო რეაგირება განმარტა როგორც „უდიდესი ცალკეული ლოგისტიკური გმირობა“ მისი 40 წლის მსახურების განმავლობაში.

გენერალი კარტერის ინფორმაციით, სამხედროები ჯანდაცვის სფეროს წარმომადგენლებთან ერთად მუშაობდნენ ფრონტის წინა ხაზზე და მონაწილეობას იღებდნენ გეგმების შემუშავებასა და ტესტირების პროცესში, თან საგარეო საქმეთა სამინისტროს ეხმარებოდნენ რეპატრიაციის განხორციელებაში. მან იქვე დასძინა, რომ სამხედროები ამზადებდნენ მობილურ და იოლად ასაგებ-დასაშლელ კონსტრუციებს საველე ტესტირების ცენტრების ფუნქციონირებისთვის, რათა ქვეყანაში ახალ კორონავირუსზე მეტი ადამიანის შემოწმება ყოფილიყო შესაძლებელი.

მანამდე, მთავრობა აცხადებდა, რომ დღეში 100 000 ადამიანის ტესტირების სამიზნე ორიენტირს აპრილის ბოლომდე შეასრულებდა, ე.ი. ორშაბათის მონაცემებით მაჩვენებელი 82 000 ადამიანით უნდა გაზრდილიყო.

ლეობორისტული პარტიის ლიდერი სერ კეირ სტარმერი, რომელიც ჩრდილოვანი პრემიერ-მინისტრის რანგში პირველად წარსდგა ბრიფინგზე, აცხადებდა, რომ გაერთიანებულ სამეფოს ძალიან დააგვიანდა და სხვა ევროპულ ქვეყნებს ბევრად ჩამორჩება ტესტირების საკითხში. მან იკითხა, როგორ ესახებოდა მთავრობას სულ რაღაც რვა დღეში 18 000 ადამიანის ტესტირებიდან 100 000 ადამიანამდე ამ მაჩვენებლის გაზრდა.

ბატონი რააბი აცხადებს, რომ გაერთიანებული სამეფოს ტესტირების შესაძლებლობები დღეში ამჟამად 40 000 ადამიანს იტევს, თუმცა პროცესში ახალი ლაბორატორიების ჩართვის შედეგად მთავრობა სამიზნე ორიენტირსაც დააკმაყოფილებს.