5 დღიანი ომის მეორე დღე - "ოცნების" ლიდერები მუხთაგვერდის სასაფლაოზე მხოლოდ დღეს მივიდნენ

5 დღიანი ომის მეორე დღე - "ქართულმა ოცნებამ" აგვისტოს ომის დაწყების თარიღიც კი სადავო გახადა. ომის დანაშაულის პირდაპირი მტკიცებულებების მიუხედავად, ხელისუფლება დღემდე რუსული ნარატივით ამტკიცებს, რომ ომი არა 7, არამედ 8 აგვისტოს დაიწყო.

საქართველოს მთავრობის ადმინისტრაციის შენობებზე სახელმწიფო დროშები მხოლოდ დღეს დაუშვეს. მუხათგვერდის ძმათა სასაფლაოზე, სადაც აგვისტოს ომში დაღუპული გმირები განისვენებენ, ამ წუთებში პრემიერ-მინისტრი და მთავრობის წარმომადგენლები იმყოფებიან. ადგილზე არიან მისულები დიპლომატიური კორპუსის წარმომადგენლებიც.

თავდაცვის მინისტრის ჯუანშერ ბურჭულაძე "პირველების" კითხვას თუ რატომ აღნიშნავს ხელისუფლება ომის დაწყებას 8 აგვისტოს და არა 7-ში, არ პასუხობს და ჟურნალისტებს კომპეტენციას უწუნებს.

ძალიან გთხოვთ, გეყოთ კომპეტენცია და კარგად გაიაზროთ რომ არ დააზიანოთ ქვეყანა თქვენი შეკითხვით, - თქვა ბურჭულაძემ.

დაღუპული გმირების ოჯახის წევრები რუსულ სისასტიკეს იხსენებენ.

14 წელი გავიდა ჩვენი უბედურებიდან. მეოთხე ქვეითი ბრიგადა, კაპიტანი ალექსანდრე თანდაშვილი. 19 წლიდან სულ ჯარებშ მსახურობდა, 9 აპრილს მოიწამლა, აფახეთში ომში მძიმედ დაიჭრა, მოიარა ერაყო და მეოთხე ბრიგადაში დაასრულა სიცოცხლე, - ამბობს ერთ-ერთი გმირის დედა.

რუსეთის რეგულარული ძალები საქართველოში 7 აგვისტოს შემოიჭრა. 8 აგვისტოს 36 ქართული სოფელი უკვე დაბომბილი იყო. რუსული საოკუპაციო ძალების ინტერვენციების შედეგად საქართველოს 228 მშვიდობიანი მოქალაქე, 170 სამხედრო და 14 პოლიციელი დაიღუპა. საკუთარი საცხოვრებელი 150 ათასმა ადამიანმა დატოვა.