დავით ნარმანია სოფელ გლდანში მოსახლეობას შეხვდა
სოფელ გლდანის მოსახლეობას სასმელი წყლის არქონის გარდა, საკანალიზაციო სისტემის არარსებობა აწუხებს.
კოალიცია ქართული ოცნების თბილისის მერობის კანდიდატ დავით ნარმანიასთან შეხვედრაზე მოსახლეობამ განაცხადა, რომ წყალდიდობის დროს ეზოები კანალიზაციის წყლით ივსება, რაც ანტისანიტარიის კერებს ქმნის და საშიშია ჯანმრთელობისთვის. დავით ნარმანიას თქმით, მიუხედავად იმისა, რომ სასმელი წყლის პრობლემის მოგვარება წყალმომარაგების კომპანიის პრეროგატივაა, მერიის თანადაფინასებით, ერთობლივი ძალისხმევით, სოფელ გლდანში წყლის მიწოდება უახლოეს მომავალში აღდგება.
მოსახლეობასთან შეხვედრას კომპანია „ჯორჯიან ვოთერ ენდ ფაუერის“ ხელმძღვანელი გიორგი გაჩეჩილაძე ესწრებოდა, რომლის თქმით, წყლის გაყვანის სამუშაოები უკვე დაწყებულია. მისივე თქმით, 25 მაისიდან არსებული რეზერვუარის რეაბილიტაცია იწყება, პარალელურად დაგეგმილია 800 მეტრი სიგრძის მილის გაყვანა.
დავით ნარმანიამ მოსახელობას საარჩევნო პროგრამის ძირითადი მიმართულებები გააცნო და ჯანდაცვისა და სოციალური პროგრამის განხორციელების გეგმებზე ისაუბრა. თბილისის მერობის კანდიდატი მოსახლეობას ასევე ინფრასტრუქტურის, მოწესრიგებას, მდინარე გლდანულას ნაპირსამაგრი სამუშაოების ჩატარებას და საბავშვო ბაღების კეთილმოწყობას დაპირდა.
მსგავსი სიახლეები
კომენტარი