Avon–ი მექრთამეობაში ამხილეს

The Wall Street Journal–ის ინფორმაცია

საერთაშორისო კოსმეტიკური კომპანია Avon -ის ჩინეთის, ბრაზილიის, არგენტინის, ინდოეთის და იაპონიის ფილიალები სამთავრობო ორგანოებისთვის ქრთამის მიცემის გამო, კორუფციულ სკანდალში გარეულები აღმოჩნდნენ. ამ სკანდალური გამოძიების დაწყების მიზეზი 2004 წელს, “ეივონის” ჩინეთის ოფისის ერთ-ერთი თანამშრომლის წერილი გახდა, რომელშიც ის კომპანიის აღმასრულებელ დირექტორს ოფისში არსებულ კორუფციის წინააღმდეგ ბრძოლის საერთაშორისო საქმიანობაში კანონდარღვევების შესახებ აფრთხილებდა.

კომპანიამ შიდა გამოძიება 2008 წელს დაიწყო, რის შედეგადაც, ჩინეთის ფილიალის 3 ტოპ-მენეჯერი, მისი პრეზიდენტი და ფინანსური განყოფილებისა და საერთაშორისო აუდიტის ხელმძღვანელები თანამდებობებიდან დაითხოვეს. კომპანიის ამ ფილიალში არსებული დარღვევების აღმოჩენამ კომპანია იძულებული გახადა დანარჩენი შვილობილი კომპანიების საქმიანობებიც შეემოწმებინა, რამაც საკმაოდ მძიმე რეალობა აჩვენა. დარღვევები “ეივონის” თითქმის ყველა ქვეყნის ფილიალში აღმოაჩინეს, რამაც ამ კოსმეტიკურ გიგანტს რეპუტაცია საერთაშორისო მასშტაბით შეულახა. ბირჟებისა და ფასიანი ქაღალდების კომისია კომპანიას სერიოზული ჯარიმებით ემუქრება.

ეს სკანდალი შესაძლოა, არა მხოლოდ კომპანიის, არამედ, მისი პრეზიდენტის, ანდრეა იუნგის რეპუტაციისთვისაც მძიმე დარტყმა აღმოჩნდეს. 52 წლის იუნგი განვითარებადი ბაზრების ექსპერტად ითვლება და წლების განმავლობაში, “ეივონის” აღმოსავლეთში განვითარებისთვის აქტიურ ქმედებებს ახორციელებდა.

ამჟამად, ეს “რკინის ქალბატონი” Avon–ის “გონზე მოყვანას” ცდილობს. მან კომპანიის სტრუქტურასა და საკადრო საკითხებში გარკვეული ცვლილებები უკვე მოახდინა, თუმცა კომპანიის ფინანსურმა აღრიცხვებმა უჩვენა, რომ კორუფციული გამოძიების ხარჯებმა ფირმის შემოსავალს დიდი ზარალი მიაყენა.

კომენტარი