რუსეთის საპატრიარქო ცხინვალში ეკლესიას აშენებს

ცხინვალში, რუსეთის ФСБ-ს სასაზღვრო სამმართველოს ტერიტორიაზე, მოსკოვისა და სრულიად რუსთა პატრიარქ კირილის ლოცვა-კურთხევით, ალექსანდრე ნეველის სახელობის საყდრის საძირკველი ჩაიყარა.

საძირკველის ჩაყრის ცერემონიალი ვლადიკავკაზის წმინდა გიორგის სახელობის ტაძრის დეკანოზმა ტიმოთე ოსტაევმა და მორწმუნე სამხედრო მოსამსახურეებთან ურთიერთობის საკითხებში რუსეთის თავდაცვის სამინისტროს მე-4 არმიის მეთაურის თანაშემწემ, ანდრეი ზიუზიამ შეასრულეს. ამის შესახებ გაზეთი „მართლმადიდებელი ოსეთი“ იტყობინება.

ცერემონიალს ესწრებოდნენ ე.წ. სამხრეთ ოსეთის რესპუბლიკაში ФСБ-ს სასაზღვრო სამმართველოს უფროსი, გენერალ-მაიორი ალექსანდრე მურზინი, ოფიცრები, რიგითები და სამხედრო მოსამსახურეთა ოჯახის წევრები.

მამა ტიმოთემ ალექსანდრე მურზინს წმინდა ალექსანდრე ნეველის ხატი და მეორე მსოფლიო ომის დროს რუსული ეკლესიის გმირობის შესახებ დაწერილი წიგნი: „"Спаси и сохрани" უსახსოვრა.

საყდარში წირვა-ლოცვის დაწყება 6 დეკემბერსაა დაგეგმილი, როცა რუსეთში ალექსანდრე ნეველის ხსენების დღე აღინიშნება.

კომენტარი