ბაქრაძე: თუ რუსეთმა თავისი ფლოტი გამოიყენა ქართული გემების წინააღმდეგ, ეს იქნება ომის გამოცხადება...

“დრონი.ჯი”: ბათონო დავით, სერგეი ბაღაფშის პროვოკაციული განცხადებით დავიწყოთ... მან განაცხადა: “აფხაზეთის საზღვაო აკვატორიაში” გამოჩენილ პირველსავე ქართულ მცურავ საშუალებას ცეცხლს გავუხსნიო. მისი ეს განცხადება ხომ არ არის იმის მცდელობა, რომ როგორმე ომში ჩაგვითრიონ? დავით ბაქრაძე: ძალიან პროვოკაციული განცხადებაა და ყველაზე სამწუხარო ისაა, რომ როგორც ჩანს, ბაღაფშის ეს განცხადება შეთანხმებული იყო რუსეთის სახელისუფლებო წრეებთან. ბაღაფში ასეთ მუქარას ვერ გაბედავდა, ზურგს რუსეთი რომ არ უმაგრებდეს. ამ კონკრეტულ შემთხვევაში - რუსეთის შავი ზღვის ფლოტი. სეპარატისტულ რეჟიმს არანაირი რესურსი არა აქვს, რომ ქართულ სასაზღვრო ხომალდებს ცეცხლი გაუხსნას. გეთანხმებით, ეს განცხადება მისაღებია რუსეთისთვის, რამდენადაც, რუსეთისთვის მისაღებია ყველა სახის პროვოკაცია, რაც საბაბს მისცემს საქართველოსთან ხელახალი აგრესიისთვის, თუ აგრესიის გასაგრძელებლად. მეორე მხარე ამ მუქარიდან გამომდინარე არის, ასევე რუსეთის გარკვეული წრეების - აფხაზეთის ხელისუფლების ზოგიერთი წარმომადგენლის სურვილი, რომ აფხაზეთი იყოს უკონტროლო ზონა, სადაც შეუფერხებლად, სწორედ საზღვაო გზით შევა ნარკოტიკი, იარაღი და აფხაზეთი კრიმინალურ ანკლავად გადაიქცევა. არა მგონია რუსეთს ახალი ომის საბაბად რაიმე პროვოკაციის გამოყენება სურდეს, რადგან დღეს არავის ინტერესებში არ უნდა შედიოდეს ფართომასშტაბიანი საბრძოლო მოქმედებები. თუმცა, გამორიცხული არაფერია და თუ რუსეთმა თავისი ფლოტი გამოიყენა საქართველოს საზღვაო აკვატორიაში ქართული სასაზღვრო გემების წინააღმდეგ, მაშინ ეს აღარ იქნება პროვოკაცია, ეს იქნება, ომის გამოცხადება. “დრონი.ჯი”: თუ ქართულ სასაზღვრო გემებს ცეცხლი გაუხსნეს, რას იზამს ხელისუფლება? დავით ბაქრაძე: ყველანაირი საშუალება უნდა ვიღონოთ, რათა თავიდან ავიცილოთ პროვოკაცია. მაქსიმალურად უნდა ჩაერთონ საერთაშორისო ორგანიზაციები პროცესში და რუსეთზე ზეწოლაც უნდა მოახდინონ. კი, შარშან, საკმაოდ ეფექტური იყო საერთაშორისო საზოგადოების ძალისხმევა, როცა საქართველო ოკუპირებული იყო და ამ ძალისხმევის წყალობით რუსეთის ჯარები თბილისში არ შემოვიდნენ, მაგრამ დამეთანხმებით, ყველაფერი მეტად დაგვიანებული აღმოჩნდა. მთელი 4 დღე გავყვიროდით, რომ საქართველოს ოკუპაციის საფრთხე არსებობდა, მაგრამ საერთაშორისო საზოგადოება ამაში მხოლოდ დეფაქტო დარწმუნდა. ამიტომ უცხოეთის ქყვეყნების მყისიერი რეაგირება და საქართველოს ხელისუფლების გონივრული მოქმედებაა ერთადერთი პრევენციული საშუალება. თუ ღმერთი გაუწყრათ და მართლა ესროლეს ჩვენს სასაზღვრო გემებს, საქართველოს ხელისუფლება, ცხადია, ყველა კანონიერი საშუალებით დაიცავს თავის სუვერენულ უფლებებს საკუთარ საზღვაო აკვატორიაში. თუმცა, ღმერთმა ნუ ქნას, აქამდე მივიდეთ. ყველაფერი უნდა ვიღონოთ, რომ რუსეთს საქართველოზე აგრესიის განხორციელების საბაბი არ მიეცეს. “დრონი.ჯი”: მალე პრალამენტი ლუსტრაციის კანონს განიხილავს და უახლოეს მომავალში, ალბათ მიიღებს. რას ელით ამ კანონისგან და რამდენად ეფექტური იქნება საბჭოთა კავშირის დაშლიდან 18 წლის შემდეგ? დავით ბაქრაძე: ამ კანონს აუცილებლად მიიღებს პარლამენტი და მიუხედავად იმისა, ისე ეფექტურად ვერ გამოვიყენებთ, როგორც ეს ბალტიის პირეთისა და აღმოსავლეთ ევროპის ქვეყნებში მოხდა, გარკვეული პოზიტიური შედეგები მაინც იქნება. სსრკ აღარ არსებობს, მაგრამ შარშან დავრწმუნდით, რომ რუსეთს უწინდელზე არანაკლები ინტერესი აქვს საქართველოს მიმართ. ასევე 2007 წლის შემოდგომიდან დაწყებული შიდა პროცესები, რომლებიც დღემდე გრძელდება, შარშანდელი აგვისტოს მოვლენები და მისი თანმდევი პროცესები დასტურია იმისა, რომ რუსეთის გავლენა საქართველოზე სოლიდურია და თავისი იმპერიული გეგმების შემსრულებლები საქართველოში მრავალად ჰყავს. ქართველმა ხალხმა უნდა იცოდეს იმ ხალხის წარსული, ფარული საქმიანობა, რომელიც ქართული პოლიტიკის ელიტას წარმოადგენს. და ეს არ ეხებათ მხოლოდ ოპოზიციონერებს. ეს კანონი ხელისუფლების ინტერესებს არ არის მორგებული. მისი ამოქმედება პოლიტიკასა და ჩინოვნიკურ საქმიანობას ჩამოაცილებს არაერთ სახელმწიფო მოხელესა და სახელისუფლებო გუნდის წევრებს. ეს სრულიად ნორმალური პროცესია და ამას უნდა შევეგუოთ. მეტიც, კანონი საკომიტეტო და ფრაქციულ განხილვებს გაივლის და მე მომხრე ვარ, ამ პროცესში კანონს დაემატოს ცვლილებები, რომელიც არამარტო რუსეთის, არამედ ნებისმიერი უცხო სახელმწიფოს სპეც-აგენტურას თუ გავლენის აგენტებს გამოავლენს. ამით ქვეყანა ბევრს მოიგებს. “დრონი.ჯი”: გაზაფხულზე მიმდინარე საპროტესტო აქციებმა ბევრი ოპოზიციური ლიდერის ლუსტრირება მოახდინა. ზოგიერთებმა რამდენიმეთვიანი აქციისას, როცა მიკროფონი ხელგაუგდებლად ეჭირათ ხელში, სიტყვაც კი არ დაასველა რუსეთის საოკუპაციო ჯარების წინააღმდეგ. იმავე ნინო ბურჯანაძემ, სალომე ზურაბიშვილმა, ზვიად ძიძიგურმა, გოგა ხაინდრავამ, დავით გამყრელიძემ... ავით ბაქრაძე: არ შეუდგები პერსონიფიცირებას, საზოგადოება ყველაფერს ხედავს და დასკვნებსაც თავად გაააკეთებს. არ მინდა ლუსტრაციის კანონი კუდიანებზე ნადირობას დაემსგავსოს და ამას არც ვაპირებთ. ვიმეორებ, ის თანაბრად შეეხება როგორც ჩვენს პოლიტიკურ მომხრეებს, ასევე მოწინააღმდეგეებს. "დრონი.ჯი”: ოპოზიციის ერთი ნაწილი, როგორც იქნა, დათანხმდა ხელისუფლებასთნ დიალოგს. ოპოზიციის მეორე ნაწილი ამ ხალხს აკრიტიკებს, ისინი ირწმუნებიან, ეს დიალოგი შედეგს ვერ გამოიღებსო. რას ეტყვით ამ ხალხს? რეალურად, რა შედეგს უნდა ველოდოთ და როდის? დავით ბაქრაძე: გაზაფხულზე მიმდინარე პროცესები ყველასთვის კარგი გაკვეთილი იყო. კიდევ ერთხელ დავრწმუნდით, რომ პოლიტიკა ქუჩაში არ კეთდება, იქიდან არ იმართება. პოლიტიკა შესაბამისი ინსტიტუტებიდან იმართება. მოხარული ვარ, რომ არასაპარლამენტო ოპოზიციის გარკვეული ნაწილი დიალოგის რეჟიმშია - ბატონები: კონსტანტინე გამსახურდია, ირაკლი ალასანია, აკაკი ასათიანი. ეს ხალხი მზად არიან, ჩაერთონ საკონსტიტუციო კომისიის მუშაობაში, საარჩევნო კოდექსის ცვლილებებზე იმუშაონ და ცხადია, მათი მონაწილეობა ამ პროცესებში დადებით შედეგს გამოიღებს იმ თავალსაზრისით, რომ უფრო დემოკრატიულ, ხალხის მოთხოვნებზე გათვლილ კონსტიტუციას და საარჩევნო კოდექსს მივიღებთ. აქვე დავამატებ, რომ ერთობლივად შევიმუშავებთ ცენტრალურ საარჩევნო კომისიის კომპრომისულ ადმინისტრაციას. ეს ყველაფერი ამ ეტაპზე არ არის ცოტა, მით უფრო, რომ მუშაობა გრძელდება. ამას დავამატებ იმ ცვლილებებს, რომელიც შეგვიძლია სასამართლო რეფორმის ერთ ეტაპადაც განვიხილოთ, ვგულისხმობ კანონს, რომელიც მოსამართლეებს დაიცავს ნებისმიერი სახის ზეწოლისგან. აღნიშნულ საკითხზეც არასაპარლამენტო ოპოზიციის ლიდერებთან ერთად ვმუშაობთ. “დრონი.ჯი”: მაგრამ ქუჩაში რჩება ოპოზიციის ყველაზე რადიკალური ნაწილი თავისი მომხრეებით. ეს ადამიანები დიალოგზე ცოცხალი თავით არ მოდიან და სექტემბრიდან ახალი საპროტესტო ტალღის აგორებას აპირებენ. დამეთანხმებით, ოპოზიციის ეს ყველაზე რადიკალური ნაწილი თავისი მხარდამჭერებით, დიდ საფრთხეს შეუქმნის ხელისუფლებას. შეიძლება ითქვას, მათ შორის არიან ისეთებიც, რომლებიც ყველაფერზე წავლენ, რათა ქვეყანაში დესტაბილიზაცია გამოიწვიონ. დავით ბაქრაძე: გეთანხმებით, არსებობს სერიოზული რისკები, მაგრამ თუ ხელისუფლებას ვინმემ უკანონო ქმედებებით საფრთხე შეუქმნა, მაშინ ვიმოქმედებთ კანონის ფარგლებში, რათა დავიცვათ სახელმწიფო ინსტიტუტები და წესრიგი, თუმცა, შესაძლოა, ძალიან არასასურველი, არასასიამოვნო მეთოდების გამოყენება მოგვიწიოს. თუმცა, სხვა გზას თუ არ დაგვიტოვებენ, ვიმოქმედებთ - ქვეყანას არავის დავანგრევინებთ. არასაპარლამენტო ოპოზიციის ქუჩაში დარჩენილ ნაწილს ვეტყვი - რაც მეტ ხანს იქნებიან ქუჩაში, მით უფრო მალე მოახდენენ საკუთარი თავის მარგინალიზაციას. მოუწოდებ დიალოგისკენ და იმ პრობლემების ერთად მოგვარებისკენ, რომელსაც საზოგადოება მოითხოვს. ხელისუფლებამ მიიღო ის სიგნალები, რასაც საპროტესტო აქციებზე ხალხი აფიქსირებდა პრეტენზიების სახით და მათი გადაჭრა ოპოზიციის ნაწილთან ერთად უკვე დაიწყო. სხვები, რაც მალე შემოგვიერთდებიან, მით უკეთესი. თუ გინდა, რომ მიიღო ის, რასაც ითხოვდი, უნდა ჩაერთო ამ პროცესში, ან არადა, გამოდის, რომ არაგუწრფელად ითხოვდი ან თვალთმაქცობდი და ამ მოთხოვნების უკან სხვა გეგმა გქონდა. “დრონი.ჯი”: ოპოზიციის ნაწილი აცხადებს, რომ ხელისუფლება დიალოგის პარალელურად სდევნის ოპოზიციის ლიდერებეს და მათ ახლობლებს. ამის დამადასტურებელ ბოლო ფაქტად, ქობულეთში ეკა ბესელიას შვილისა და ძმის დაკავება მოჰყავთ. ეკა ბესელიას ძმა ახლაც ციხეშია. დავით ბაქრაძე: თქვენ ალბათ გემახსოვრებათ ის პერიოდი, როცა ეროვნული მოძრაობისას პოლიტიკური პარტიის წევრობა იყო იმუნიტეტი და თუ ეროვნული მოძრაობის წევრს, თუნდაც მძიმე დანაშაულზე დაიჭერდა მაშინდელი მილიცია, ერთ მიტინგს მოაწყობდნენ მილიციასთან და ამ დამნაშავეს უშვებდნენ. მერე იყო გვარდიისა და “მხედრიონის” თარეშის პერიოდი. საკმარისი იყო გვარდიელის მოწმობა ან მხედრიონელის ჟეტონი და ხელშეუხებელი იყავი. ასეთი იმუნიტეტები წარსულს ჩაბარდა. ეკა ბესელიას ოჯახის წევრების საქმეს სამართალდამცავები გამოიძიებენ და მათ ბრალეულობაზე კომენტარს ვერ გავაკეთებ. ზოგადად კი ვიტყვი, რომ პოლიტიკოსობა იმუნიტეტი არ არის. პოლიტიკოსმა თავის თავზე უნდა აიღოს უდიდესი პასუხისმგებლიბა და სხვათაშორის, ის ყველა პოლიტიკოსის ოჯახის წევრებმა, ნათესავებმა და მეგობრებმაც კი უნდა გადაინაწილონ. ასე არ შეიძლება, რაკიღა პოლიტიკოსი ვარ, თუ ჩემი ახლობელი დაიჭირეს, მაშინვე განვაცხადო, რომ ეს პოლიტიკური ანგარიშსწორებაა. ჩემი აზრით, როცა პოლიტიკოსის ახლობელი და მით უფრო ოჯახის წევრი დანაშაულს ან ამორალურ საქციელს ჩაიდენს, ის პოლიტიკოსი უნდა გამოვიდეს საჯარაოდ და ხალხს ბოდიში მოუხადოს თავისიანის უსაქციელობისთვის. აი ეს არის დამატებითი პასუხისმგებლობის აღება. რა, ვინმეს სჯერა, რომ ქართველი პოლიტიკოსების ნათესავები და ოჯახის წევრები ანგელოზები არიან და ისინი არასოდეს არღვევენ კანონს? ცხადია ასე არ არის. ეს ეხება როგორც სახელისუფლებო, ასევე ოპოზიციურ პოლიტიკოსებს. “დრონი.ჯი”: ბოლო დღეების ყველაზე აქტუალური თემა თბილისში ავტოპარკირების ახალი სისტემის მოუწესრიგებლობაა. ათეულ ათასობით ავტომფლობელს შეექმნა პრობლემა “სითიპარკის” გამოჩენის შემდეგ და ეს ხალხი დახმარებას სამართლიანად ითხოვს ხელისუფლებისაგან. რას ეტყვით მათ? დავით ბაქრაძე: პარკინგის პროპლემა აუცილებლად უნდა მოგვარდეს. ჩემი აზრით, რევოლუციური სიახლეა ამ ტიპის მენეჯმენტი და გარკვეული ხარვეზები არის იმ კომპანიის ადმინისტრირებაში, რომელიც პარკინგს ახორციელებს. ყველა სიახლე გარკვეულ პრობლემებს იწვევს, ჩვენ პარლამენტში ბევრი ვიმუშავეთ, რომ ეს პრობლემები აგვეცილებინა, მაგრამ როგორც ჩანს, მათი ნაწილი დარჩა. პარლამენტი, საშემოდგომო სესიაზე აუცილებლად განიხილავს ამ საკითხს და ავტომფლობელებს ვპირდებით, რომ მათთვის ყველაზე მისაღებ ვარიანტს მივიღებთ. თუ ვინმე დაინტერესებულია ამ პრობლემის მოგვარებით, უპირველესად მერია. მისი ხელმძღვანელობა ყველაფერს აკეთებს, რომ პარკირების საკითხი დაიხვეწოს და ხალხის უკმაყოფილებაც ჩაცხრეს.

კომენტარი