droni.ge

2011-09-15 15:44:22
მიხეილ სააკაშვილი: „კორუფციასთან დაკავშირებით ცერემონიები არ დაგვიწყია“

საქართველოს პრეზიდენტმა, მიხეილ სააკაშვილმა ვრცელი ინტერვიუ მისცა უკრაინულ ინტერნეტგამოცემას segodnya.ua. ინტერვიუს წინასიტყვაობაში გამოცემა აღნიშნავს, რომ ეს უკრაინის ბეჭდური მედიისთვის საქართველოს პრეზიდენტის მიერ მიცემული პირველი ინტერვიუა. საუბარში მიხეილ სააკაშვილი ეხება საქართველოსა და მის ფარგლებს გარეთ, მათ შორის, უკრაინაში ყველაზე აქტუალურ პრობლემებს, საუბრობს საქართველოში ჩატარებული რეფორმების შესახებ და ამომწურავად პასუხობს ჟურნალისტის შეკითხვებს ნებისმიერ თემაზე. გთავაზობთ ამ ინტერვიუს მიმოხილვასა და ფრაგმენტებს.

თავდაპირველად უკრაინელი ჟურნალისტები დაინტერესდნენ, რამდენად ინტენსიურია ურთიერთობა უკრაინასა და საქართველოს შორის ამ ეტაპზე და ხომ არ შეინიშნება გარკვეული  ცვლილებები უარესობისკენ, უკრაინის წინა ხელისუფლების პერიოდთან სედარებით, რაზეც პრეზიდენტმა უპასუხა, რომ იმდენად ინტენსიური ურთიერთობები, როგორიც ახლა საქართველოსა და უკრაინას აქვთ, ამ ქვეყნებს ჯერ არ ჰქონიათ. „რა თქმა უნდა, ამ ურთიერთობებს საფუძველი ადრე ჩაეყარა, მაგრამ მახარებს, რომ უკრაინაში საქართველო ერთთგვარად, მოდაშიც კია. აქ ჩამოდიან უკრაინელი ბიზნესმენები, ტურისტები. ბევრჯერ მიფიქრია, რატომ მოხდა ასე მაინცდამაინც ახლა? როგორც ჩანს, ჩვენ ერთმანეთს ვჭირდებით, ამ სიტყვის საუკეთესო გაგებით“, - თქვა პრეზიდენტმა და დაამატა, რომ შესანიშნავი ურთიერთობა აქვს უკრაინის ამჟამინდელ პრეზიდენტთან - ვიქტორ იანუკოვიჩთან.

საქართველოს პრეზიდენტმა ჟურნალისტებს „ვარდების რევოლუციის“ შემდეგ მოსული ხელისუფლების დაწყებულ ბრძოლაზეც უამბო, რომელიც კორუფციისა და კორუმპირებული ჩინოვნიკების წინააღმდეგ იყო მიმართული: „ჩვენ ძალიან მკაცრი მიდგომა გვქონდა ამ საკითხში და ცერემონიები არ დაგვიწყია. მაგრამ ჩვენს მიერ კორუფციისთვის დაკავებული ყოფილი ხელისუფლების ჩინოვნიკების მიმართ გარკვეული მიდგომა შევიმუშავეთ - მათ თავიანთი ქონების უკანონოდ მოპოვებული ნაწილის სახელმწიფო ბიუჯეტისთვის გადაცემა მოუწიათ, რის შემდეგაც წინა მთავრობის თითქმის ყველა დაკავებული წარმომადგენელი სახელმწიფო ბიუჯეტში დიდი ფულადი კომპენსაციის გადახდის სანაცვლოდ გათავისუფლდა. მაგალითად, ჩვენ დიდი საპენსიო დავალიანება გვქონდა. ედუარდ შევარდნაძის სიძის დაკავების შემდეგ ჩვენ სამი თვის საპენსიო დავალიანების გასტუმრება შევძელით - მან მილიონობით ლარი გადაიხადა ბიუჯეტის სასარგებლოდ. რკინიგზის დეპარტამენტის ხელმძღვანელმაც სახელმწიფო ბიუჯეტში ათობით მილიონი გადაიხადა. კონტროლის პალატის თავმჯდომარე აგარაკის გარეშე დარჩა. იქ ახლა უსახლკაროთა და ღარიბთა პანსიონია", - თქვა პრეზიდენტმა, თუმცა, აღნიშნა, რომ ასეთი მიდგომა მხოლოდ ყოფილი ხელისუფლების წარმომადგენლებისადმი შემუშავდა, თავიანთ რიგებში აღმოჩენილი დამრღვევების მიმართ კი ბევრად უფრო მკაცრები იყვნენ:

„ჩვენი გუნდის კორუმპირებულებს სასჯელის მკაცრი ზომები შეეფარდათ. ბევრი მათგანი დღესაც პატიმრობაშია. დაპატიმრებულთა შორის იყვნენ მინისტრები, მათი მოადგილეები და ქალაქების მერები. ასევე, პარლამენტის ოთხი დეპუტატი მმართველი პარტიიდან, ჩემი ყოფილი მრჩევლები, ადამიანები, რომლებსაც ვენდობოდი და პატივს ვცემდი. ეს პატარა საქართველოსთვის ძალიან ბევრია. ჩვენ ყველას ერთნაირად მივუდექით – დააკავეს, ე.ი პასუხი უნდა აგოს“. - აღნიშნა პრეზიდენტმა. 

„საქართველოში ნამდვილად წესრიგია და ის მედიის სრულ თავისუფლებას ეფუძნება“, - თქვა მიხეილ სააკაშვილმა საქართველოს დღევანდელ დღეზე საუბრისას და ფოტოგრაფ ირაკლი გედენიძის დაკავების ფაქტსაც შეეხო. პრეზიდენტის განცხადებით, ის, რომ საქართველოს წინააღმდეგ მუშაობა მიმდინარეობს, ყველამ იცის:

"დღეს ჯაშუშები არ არიან მხოლოდ ისინი, ვინც წყალქვეშა ნავებით გადაადგილდებიან, ან პარაშუტით ხტებიან", - თქვა მან. კითხვას, იყო თუ არა ირაკლი გედენიძე მისი ახლო მეგობარი, პრეზიდენტი პასუხობს, რომ ყველა თანამშრომელთან კოლეგიალური ურთიერთობა აქვს. "ჩვენ მათ ძალიან ვენდობით და არ ვუთვალთვალებთ. უბრალოდ, ისე მოხდა, რომ ის რიგითი სამუშაოს დროს კონტრდაზვერვამ დააკავა. ჩვენ კარგი კონტრდაზვერვა გვყავს. ამ სტრუქტურაში შევკრიბეთ ახალგაზრდები და მივიღეთ პატარა, თუმცა, ძალიან ეფექტური სამსახური. ისინი მუშაობენ რისკის ფასად, არასტანდარტული მეთოდებით, მაგრამ მე ვიტყოდი, ეფექტურად. როგორ ფიქრობთ, როგორი ინფორმაცია სჭირდება უცხო ქვეყნის სამსახურს? ძალიან უბრალო – ვინ მიდის და ვინ მოდის. როდესაც მუდმივად გაწვდიან ყოფით მონაცემებს, თავს ინფორმირებულად გრძნობ. თუნდაც, განსაკუთრებული საიდუმლოები არ იცოდე. როდესაც ჩვენი დაზვერვა სადმე მუშაობს, ჩვენც ასეთსავე რუტინულ ინფორმაციას ვაგროვებთ და არა რაღაც სკანდალურ საიდუმლოებს. გაუშიფრავი საიდუმლო მსოფლიოში უკვე აღარ დარჩა", - აცხადებს პრეზიდენტი. 

პრეზიდენტმა 26 მაისის აქციის დაშლის შესახებაც ისაუბრა და განაცხადა, რომ მისი დაშლის შესახებ გაცემულ ბრძანებას არ ნანობს. მისი თქმით, მთავრობას სხვა გამოსავალი არ ჰქონდა: "მიმაჩნია, რომ სწორად მოვიქეცით. პროვოკატორების ჯგუფი, რომელიც საზღვარგარეთიდან ფინანსდება და ელექტორატის მიზერული, 1%-ზე ნაკლები მხარდაჭერა აქვს, გამოდის ქუჩაში და გეუბნება – დამოუკიდებლობის 20 წლისთავის აღნიშვნის უფლებას არ მოგცემთ და მორჩა. რა უნდა გვექნა? უნდა გამოგვეყენებინა მინიმალური ძალა. მიტინგის დაშლისას არც ერთ პოლიციელს იარაღი არ ჰქონია და მადლობა ღმერთს, რომ ასე იყო, თორემ უცნობია, როგორ მოიქცეოდა პოლიცია მას შემდეგ, რაც მომიტინგეები ავტომობილებში ჩასხდნენ და რამდენიმე სამართალდამცავს გადაუარეს. ერთ-ერთი მათგანი დაიღუპა, სხვები საავადმყოფოებში აღმოჩნდნენ".

პრეზიდენტის თქმით, ყოველი ასეთი ფაქტის არსებობის შემთხვევაში პოლიცია იძულებულია ჩაერიოს, თუმცა, მათი ყველა ქმედება დოკუმენტურად შესწავლილია. "ყოველ ჯერზე ჩვენი პოლიციელების მომზადების დონე იზრდება. ჩვენ მათ ვასწავლით. ამჯერად ისინი გაცილებით პროფესიონალურად მოქმედებდნენ, ვიდრე 2007 წელს. თუკი მომავალ წელსაც ასეთი რამ იქნება და, ალბათ იქნება, რადგან ეს ნებისმიერ დემოკრატიულ ქვეყანაში ხდება, ისინი გაცილებით პროფესიონალურად იმოქმედებენ", - აღნიშნავს მიხეილ სააკაშვილი.

ინტერვიუში მიხეილ სააკაშვილი ეკონომიკურ ფაქტორებსაც შეეხო და აღნიშნა: 

„ენერგორესურსების ერთი მიმწოდებელი იგივეა, რაც სიკვდილი, ეს არის ფაქტორი, რომელიც შანტაჟისთვის ყველაზე კარგია. 2005 წელს, როდესაც რუსეთმა საქართველოს ელექტროენერგიისა და გაზის მიწოდება შეუწყვიტა, არ ვიცოდით, რა უნდა გვექნა. ეს იმიტომ, რომ ენერგორესურსების 90% ჩვენ რუსეთისგან მოგვეწოდებოდა. თუმცა, მალე შიდა რესურსები აღმოვაჩინეთ და ახლა პირიქით, ელექტროენერგიის ექსპორტს რუსეთში ვახორციელებთ. როდესაც რუსეთმა ჩაკეტა ბაზარი, ბევრი ჩვენს გარშემო ფიქრობდა, რომ დავიღუპებოდით. ახლა რუსეთი, რომელსაც მსოფლიო სავაჭრო ორგანიზაციაში გაწევრიანება სურს, თავად გვთხოვს, მის ბაზარზე დავბრუნდეთ. მაგრამ ახლა ეს მიპატიჟება საქართველოში ვინმეს განსაკუთრებულ ენთუზიაზზმს არ იწვევს. გაზის ნაწილს ისევ რუსეთი გვაწვდის, თუმცა სხვა მომწოდებელიც გვყავს", - განაცხადა პრეზიდენტმა.

მისივე თქმით, ეს გაკვეთილი რუსეთშიც ისწავლეს და საომარი ფონის მიუხედავად, რუსეთ-საქართველოს ურთიერთობები შედარებით მოწესრიგებული და საქმიანი გახდა. როგორც პრეზიდენტი აღნიშნავს, იმის მიუხედავად, რომ "რაო" საქართველოში რამდენიმე ელექტროკომპანიას, "იტერა" კი რამდენიმე გაზგამანაწილებელ ქსელს ფლობს, არ ნიშნავს, რომ საქართველო რუსეთზეა დამოკიდებული.

"ეს იმიტომ, რომ ჩვენ ამ სისტემების ექსპლუატაციას თავად ვერ შევძლებთ. ამ კუთხით დამოკიდებული ვართ რუსეთზე და ზუსტად ასევე ის დამოკიდებულია ჩვენზე. ომის დროსაც კი რუსეთში ელექტროენერგიის ექსპორტი არ შეგვიწყვეტია", - აღნიშნა პრეზიდენტმა. 

ორიგინალი